عالمی برادری فلسطینیوں کے خلاف اسرائیل کی جنگ بندی پرکردار اداکرے ،وزیر مذہبی امور

مذہبی امور اور بین المذاہب ہم آہنگی کے وزیر انیق احمد نے غزہ میں چار ہزار سے زیادہ فلسطینیوں کی شہادت کے واقعات پر گہرے دکھ کا اظہار کیا ہے۔

آج(اتوار) کو اسلام آباد میں ایک تقریب سے خطاب کرتے ہوئے انہوں نے اسرائیل کی وحشیانہ جارحیت کے فوری خاتمے کامطالبہ کیا ۔

وفاقی وزیر نے کہاکہ اسلامی تعاون تنظیم سمیت مسلمان، عالمی برادری کی جانب امید بھری نظروں سے دیکھ رہے ہیں کہ وہ اسرائیل کے جنگی جرائم رکوائے گی۔

ستاون اسلامی ملکوں کے کمزور کردارپرافسوس کااظہار کرتے ہوئے انیق احمد نے کہاکہ مسلمان کل آبادی کا پچیس فیصد ہیں اورانہوں نے اس سلسلے میں متعدد مذمتی قراردادیں منظور کی ہیں لیکن وہ بے گناہ فلسطینیوں کے خلاف اسرائیلی جارحیت رکوانے میں ناکام رہے ہیں۔

انہوں نے مسلمانوں پرزوردیا کہ وہ دنیا بھر میں اسرائیل کے سفارت خانوں اور قونصل خانوں کے سامنے احتجاجی مظاہرے کریں اور پرامن طورپر اپنا احتجاج ریکارڈ کرائیں ۔

وفاقی وزیر نے مسلمانوں پرزوردیا کہ وہ آپس میں اتحاد پیدا کریں اور ان تمام انتشار پیداکرنے والے عناصر کو مستردکریں جو ان کی صفوں میں فرقہ واریت اور تقسیم پیداکرنے کے ذمہ دار ہیں۔