آندھی اور تیز بارش سے بجلی کا ترسیلی نظام متاثر

تفصیلات کے مطابق  لاہور کے مختلف علاقوں میں آندھی اور تیز بارش سے بجلی کا ترسیلی نظام متاثر ہوگیا ہے۔ لاہور کے درجنوں علاقوں میں بجلی کی فراہمی معطل ہے۔آندھی کے باعث شیخوپورہ اور ننکانہ سرکلز سب سے ذیادہ متاثر ہوئے  ہیں ۔

ترجمان لیسکو کا کہنا ہے کہ  لیسکو چیف چوہدری محمد امین  کی ہدایت پر فیلڈ اسٹاف کو الرٹ کردیا گیا ہے۔ آندھی کی شدت میں کمی کے ساتھ ہی بجلی بحالی کا عمل شروع کردیا جائے گا۔  لیسکو ریجن میں شدید آندھی کے پیش نظر لیسکو انتظامیہ کی معزز صارفین سے تعاون کی اپیل ہے۔

ترجمان لیسکو نے   صارفین سے درخواست کی  ہے کہ آندھی اور بارش کے دوران بجلی کی تنصیبات سے دور رہیں اور بجلی معطل ہونے کی صورت میں لیسکو کو مطلع کرکے عملے کے آنے کا انتظار کریں۔