پنجاب میں گندم کی خریداری کے حوالے سے بحرانی کیفیت کے معاملے کے حل کے لیے مسلم لیگ ن کے مرکزی قائدین کا آج ماڈل ٹاؤن پارٹی سیکرٹریٹ میں اہم اجلاس ہو گا۔

ذرائع کے مطابق اجلاس میں مسلم لیگ (ن) کے قائد نواز شریف اور صدر و وزیر اعظم شہباز شریف بھی شریک ہوں گے۔

اجلاس میں وزیر اعلیٰ پنجاب مریم نواز کی شرکت بھی متوقع ہے، جبکہ اہم بیٹھک میں سینئر رہنما رانا ثناء اللہ، خواجہ آصف اور دیگر سینئر رہنما بھی شریک ہوں گے۔ صوبائی وزراء اور متعلقہ حکام بھی اس اجلاس میں شرکت کریں گے۔

ذرائع کے مطابق مشاورتی اجلاس میں گندم کی خریداری کے معاملے پر پارٹی قائدین کو بریفنگ دی جائے گی۔

یاد رہے کہ گزشتہ روز بھی مسلم لیگ (ن) کے قائد نواز شریف اور وزیر اعلیٰ پنجاب مریم نواز نے گندم کی خریداری کے حوالے سے اجلاس کی صدارت کی تھی۔

عالمی بینک نے پاکستان کوکہا کہ ذاتی آمدن ٹیکس کے نظام میں اصلاحات کی سخت ضرورت ہے۔ ذاتی آمدن ٹیکس کا نظام تنخواہ دار اور غیر تنخواہ دار طبقات کے لیے برابر بنانا چاہیے۔

عالمی بینک نے جنرل سیلز ٹیکس کے نظام میں موجود خرابیوں کو بھی دور کرنے کی تجویز دی ہے۔

اس کے علاوہ ورلڈ بینک نے تمباکو کی صنعت پر بھی ایک ہی پریمیم شرح پر ٹیکس وصول کرنے کی سفارش کی ہے۔ ان کے تخمینوں کے مطابق اگر ان تمام تجاویز کو عمل میں لایا گیا تو ٹیکس کلیکشن میں اضافہ ہوسکتا ہے۔

معروف اقتصادی شخصیت ڈاکٹر ندیم الحق نے بھی اصلاحاتی ایجنڈا کی اہمیت کو سراہا۔ انہوں نے کہا کہ پاکستانی ٹیکس چوری کرنے والے کو کسی صورت نہیں چھوڑا جائے گا۔ ان تجاویز کو لے کر فوری اصلاحاتی ایجنڈا کے تحت آئی ایم ایف سے اگلی کانفرنس میں بات چیت ہوگی۔

9 مئی کے پرتشدد مظاہروں سے متعلق کیسز میں انسداد دہشتگردی کی عدالت نے پیش نہ ہونے پر 14 ملزمان کے قابل ضمانت وارنٹ گرفتاری جاری کر دیئے۔ان ملزمان کو گزشتہ روز ہونے والی مقدمے کی کارروائی کیلئے حاضر ہونا تھا لیکن وہ پیش نہ ہوئے۔

ذرائع کے مطابق جج ارشد جاوید نے پولیس کو ہدایت دی کہ جناح ہاؤس اور عسکری ٹاور حملہ کے معاملے میں ملزمان کو 15 مئی کو عدالت میں پیش کیا جائے۔ ان کے بعد جج نے ملزمان کو نئے ضمانتی مچلکے جمع کرانے کا بھی حکم دیا۔

ملزمان میں عطا الرحمٰن، عبدالرحمٰن، اکرام اللہ، عبدالہادی، امان اللہ، علی حسن، شہباز صدیق، روبینہ رضوان، عرفان جمیل، سعید شاہ، محسن گل آغا اور محمد پرویز شامل ہیں۔

ان کے علاوہ انسداد دہشتگردی کی عدالت نے پاکستان تحریک انصاف کے سابق رہنما جمشید اقبال چیمہ اور ان کی اہلیہ مسرت اقبال چیمہ کو بھی 9 مئی کے فسادات سے متعلق مزید 7 مقدمات میں عبوری ضمانت منظور کی ہے۔

جج ارشد جاوید نے دونوں ملزمان کی ضمانت کی درخواستیں 21 مئی تک منظور کرنے کی اجازت دی ہے اور دونوں کو ایک ایک لاکھ روپے کے ضمانتی مچلکے جمع کرانے کا بھی حکم دیا ہے۔

ملزمان نے عسکری ٹاور، شادمان تھانے، (ن) لیگ کے پارٹی دفاتر اور دیگر پر حملوں کے مقدمات میں ضمانت کی درخواست کی تھی۔

یاد رہے کہ گزشتہ سال 9 مئی کو عمران خان کی گرفتاری کے بعد ملک بھر میں پُرتشدد فسادات کے نتیجے میں نمایاں بے امنی دیکھی گئی تھی۔