حکومت نے حج 2024میں ایک لاکھ روپے کی کمی کردی

حکومت نے آئندہ سال کی حج پالیسی کا اعلان کر دیا ہے جس کے تحت ہر حاجی کیلئے حج پیکج میں ایک لاکھ روپے تک کی کمی کر دی گئی ہے۔

مذہبی امور کے وفاقی وزیر انیق احمد نے آج(جمعرات) اسلام آباد میں ایک نیوز کانفرنس میں نئی حج پالیسی کی اہم خصوصیات بتاتے ہوئے کہا کہ سرکاری سکیم کے تحت آئندہ سال کیلئے حج اخراجات دس لاکھ75 ہزار روپے کر دیئے گئے ہیں جو رواں سال گیارہ لاکھ75 ہزار روپے تھے۔

انہوں نے کہا کہ پاکستان کیلئے ایک لاکھ اناسی ہزار دو سو دس افراد کا حج کوٹہ ہے جو سرکاری اور نجی سکیموں میں مساوی تقسیم کیا جائے گا۔

انیق احمد نے کہا کہ حج 2024 ڈیجیٹلائزڈ ہو گا جس میں عازمین حج ایک موبائل ایپلی کیشن حاصل کریں گے جو انٹرنیٹ کے بغیر استعمال کی جا سکتی ہے۔ اس ایپ میں شکایات درج کرانے سمیت بہت سے آپشنز ہوں گے۔

انہوں نے کہا کہ حج درخواستیں اس ماہ کی ستائیس تاریخ سے وصول کی جائیں گی اور یہ عمل اگلے ماہ کی بارہ تاریخ تک جاری رہے گا۔ اس حوالے سے اشتہار جلد شائع کیا جائے گا۔

مذہبی امور کے وزیر نے کہا کہ روڈ ٹو مکہ منصوبے میں اسلام آباد ایئر پورٹ کے علاوہ کراچی کو بھی شامل کیا گیا ہے۔ انہوں نے کہا کہ ہم نے سعودی عرب سے لاہور کو بھی اس منصوبے میں شامل کرنے کی درخواست کی ہے۔