پاکستان مالدیپ کے ساتھ دوطرفہ تعلقات بڑھانے کا اعادہ کرتا ہے ،مرتضی سولنگی

نگران وزیر اطلاعات و نشریات مرتضیٰ سولنگی نے علاقائی تعاون کے فروغ کیلئے مالدیپ کے ساتھ مل کر کام کرنے کے عزم کا اظہار کیا ہے۔

انہوں نے آج(ہفتہ) کو مالدیپ میں مالدیپ کے نئے منتخب صدر محمد معیزو سے ملاقات میں کہا پاکستان مالدیپ کے ساتھ اپنے تعلقات کو بہت اہمیت دیتا ہے اور دونوں ممالک گہرے برادرانہ رشتے میں منسلک ہیں۔

مرتضیٰ سولنگی نے کہا سارک رکن ملک کے طور پر پاکستان مالدیپ کے ساتھ تمام شعبوں میں تعاون بڑھانے کا خواہشمند ہے۔

وزیر اطلاعات نے وزیراعظم انوار الحق کاکڑ اور پاکستان کے عوام کی طرف سے محمد معیزو کو صدر منتخب ہونے پر مبارکباد دی۔

ملاقات میں پاک مالدیپ تعلقات، اقتصادی تعاون اور مالدیپ کے لئے سفیر کی تعیناتی سمیت مختلف امور پر تبادلہ خیال کیا گیا۔

نگران وزیر اطلاعات نے صدر معیزو کو دورہ پاکستان کی دعوت دی جو انہوں نے قبول کر لی۔