کراچی: ضلع وسطی کے مختلف علاقوں میں مائیکرو اسمارٹ لاک ڈاؤن نافذ

جی این این  کے مطابق کراچی کے  ضلع وسطی میں شامل گلبرگ، لیاقت آباد اور نارتھ ناظم آباد کے مختلف علاقوں میں مائیکرو اسمارٹ لاک ڈاؤن لگانے کا نوٹیفکیشن  جاری کردیا گیا۔ نوٹیفکیشن کے مطابق متاثرہ علاقوں میں آنے اور جانے والے تمام افراد کو ماسک پہننا لازمی قراردیا گیا ہے جبکہ لوگوں کی غیر ضروری نقل و حرکت پر پابندی ہوگی،  ان علاقوں میں تمام کاروباری سرگرمیاں مکمل کورونا ایس او پیز کے مطابق ہونگی، نوٹیفکیشن میں کہا گیا ہے کہ متاثرہ علاقوں میں فیملی اجتماع پر پابندی ہوگی۔

دوسری جانب پنجاب بھر میں لاک ڈاؤن کی مدت بڑھا دی گئی جوکہ اب صوبے بھر میں 30 مئی تک نافذ العمل رہے گا۔لاک ڈاؤن میں توسیع کے حوالے سے نوٹیفکیشن سیکریٹری پرائمری اینڈ سیکنڈری ہیلتھ کیئر کی جانب سے جاری کیا گیا۔

واضح رہے کہ ملک بھر میں کورونا کی تیسری لہر جاری ہے ، نیشنل کمانڈ اینڈ آپریشن سینٹر کی جانب سے جاری کیے گئے تازہ اعداد و شمارکے مطابق گزشتہ 24 گھنٹوں میں کورونا سے مزید74فراد چل بسے ۔ ملک میں  اموات کی مجموعی تعداد 19 ہزار617ہوگئی ہے،جبکہ  متاثرہ افراد کی مجموعی تعداد 8 لاکھ 80ہزار 362ہو گئی ہے ۔

سندھ میں کورونا وائرس سے سب سے زیادہ متاثرہ مریضوں کی تعداد  2 لاکھ 99ہزار 194ہو گئی جبکہ صوبے میں اب تک 4 ہزار 801 افراد جان کی بازی ہار گئے ۔ ملک میں گزشتہ 24 گھنٹوں میں مثبت کیسز کی شرح 8.80 فیصد رہی۔