عام انتخابات بیوروکریسی سے کرانے کا نوٹی فکیشن معطل

لاہور ہائی کورٹ نے عام انتخابات بیوروکریسی سے کرانے کا الیکشن کمیشن کا نوٹی فکیشن معطل کر دیا، پی ٹی آئی کی درخواست پر محفوظ فیصلہ سنا دیا گیا، لارجر بینچ تشکیل دینے کی سفارش، فائل چیف جسٹس لاہور ہائی کورٹ کو ارسال کر دیا گئی۔

لاہور ہائی کورٹ کے جسٹس باقر علی نجفی نے اپنے فیصلے میں کہا کہ الیکشن کرانے میں قوم کے اربوں روپے لگتے ہیں، اگر بڑی جماعتیں الیکشن نتائج تسلیم نہ کریں تو قوم کا پیسہ ضائع ہو گا۔

لاہور ہائی کورٹ کے حکم کے بعد الیکشن کمیشن نے عام انتخابات کے لیے ڈی آر او، آر اوز اور اے آر اوز کی ٹریننگ روک دی۔ الیکشن کمیشن نے 13 دسمبر سے ڈسٹرکٹ ریٹرننگ افسران( ڈی آر اوز) اور ریٹرننگ افسران ( آر اوز) کی ٹریننگ کا آغازکیا تھا۔

142 ڈسٹرکٹ ریٹرننگ افسران کو 16 دسمبرکو ایک روزہ ٹریننگ جب کہ ریٹرننگ آفیسرز کو 13 سے 15 دسمبر تک ٹریننگ دی جانی تھی۔عدالت عالیہ کے فیصلے بعد الیکشن کمیشن نے چاروں صوبائی الیکشن کمشنرز کو مراسلے ارسال کرکے ڈی آراوز، آراوز کی ٹریننگ روکنے کے احکامات دے دیئے۔

خیال رہے کہ گزشتہ دنوں الیکشن کمیشن نے انتخابات کے لیے ڈپٹی کمشنرز کے بطور ڈسٹرکٹ ریٹرننگ افسران( ڈی آر اوز)، ریٹرننگ افسران ( آر اوز) اور اسسٹنٹ ریٹرننگ افسران ( اے آر اوز) کی تعیناتی کا نوٹیفکیشن جاری کیا تھا۔ لاہورہائی کورٹ نے الیکشن کمیشن کے 11 دسمبر کے نوٹیفکیشن کو معطل کردیا۔

تحریری حکم میں کہا گیا کہ موجود صورتحال میں جنرل الیکشن سے مطلوبہ نتائج حاصل نہیں ہوسکتے جس سے جمہوریت کا مستقبل کمزور ہوسکتا ہے۔

عدالتی حکم میں کہا گیا کہ درخواست میں قومی ایشو سے متعلق نشاندہی کی گئی ہے لہٰذا درخواست پر لارجر بینچ کے لیے فائل چیف جسٹس کو بھجوائی جاتی ہے اور الیکشن کمیشن کی جانب سے بیورورکریسی سے خدمات لینے کا نوٹیفکیشن معطل کیا جاتا ہے۔