پاکستان میں پولیو مہم کا آغاز

پانچ سال سے کم عمر بچوں کو پولیو سے بچائو کے قطرے پلانے کیلئے مختلف دورانیے کی ملک گیر انسداد پولیو مہم کل (پیر) شروع ہورہی ہے ۔مہم کے دوران محکمہ صحت کی پولیو ٹیمیں ملک کے تمام ایک سو انسٹھ اضلاع میں گھر گھر جاکر بچوں کو پولیو سے بچائو کے قطرے پلائیں گی۔

پنجاب میں پورا ہفتہ جاری رہنے والی انسداد پولیو مہم کے دوران دو کروڑ تیس لاکھ سے زائد بچوں کو پولیو سے بچائو کے قطرے پلائے جائیں گے۔محکمہ صحت نے اس حوالے سے لاہور، فیصل آباد اور ملتان حساس ترین شہر قراردئیے ہیں ۔خیبرپختونخوا میں پانچ روزہ مہم کے دوران پانچ سال تک کی عمر کے چوہتر لاکھ سے زائد بچوں کو پولیو سے بچائو کے قطرے پلائے جائیں گے۔

گلگت بلتستان میں پانچ روزہ انسداد پولیو مہم کے دوران ڈھائی لاکھ سے زائد بچوں کو پولیو سے بچائو کے قطرے پلائے جائیں گے۔اگر کسی گھر تک پولیو ٹیم نہیں پہنچتی تو اس صورت میں والدین ہیلپ لائن نمبر 1166پر رابطہ کرسکتے ہیں۔