فرح گوگی کے اثاثوں کی تفصیلات سامنے آگئیں

اسلام آباد: قومی احتساب بیورو (نیب) کی جانب سے 190 ملین پاؤنڈ سکینڈل کیس میں بشریٰ بی بی کی عزیز فرح گوگی کے اثاثوں کی تفصیلات احتساب عدالت میں سامنے آگئی ہیں۔

نیب رپورٹ کے مطابق فرح گوگی پاکستان میں متعدد پلاٹ، گھر اور گاڑیوں کی مالک ہیں۔ پاکستان میں ان کے نام پر نو پلاٹ ہیں جن میں سے پانچ لاہور اور چار اسلام آباد میں ہیں۔ ڈی ایچ اے لاہور میں ان کے پاس چار اور 10 مرلہ پلاٹ ہیں۔

رپورٹ کے مطابق فرح گوگی کے پاس نجی ہاؤسنگ سوسائٹی لاہور میں 2.5 اور 4 مرلہ کے پلاٹ ہیں۔ اس کے علاوہ اسلام آباد میں 40 کنال اور 100 کنال کی دو اراضی ان کے نام منتقل کی گئی ہے۔

رپورٹ میں مزید کہا گیا ہے کہ فرح گوگی کے نام پر کروڑوں روپے مالیت کی مختلف گاڑیاں ہیں جن میں پاکستان میں 22 گاڑیاں بھی شامل ہیں جب کہ ان کے کراچی اور لاہور کے مختلف بینکوں میں 29 بینک اکاؤنٹس رجسٹرڈ ہیں۔

خیال رہے کہ 190 ملین پاؤنڈز کیس میں اسلام آباد کی احتساب عدالت نے شہزاد اکبر، زلفی بخاری اور فرح گوگی کے بینک اکاؤنٹس منجمد کرنے کا حکم دیا ہے۔