انکوائری کے دوران کسی بھی آفیسر کا میڈیا ٹرائل نہیں کیا جائے گا،چیئرمین نیب

چیئرمین قومی احتساب بیورو ( نیب) لیفٹیننٹ جنرل (ریٹائرڈ) نذیر احمد نے کہا ہے کہ وہ افسران کو یقین دہانی کروانا چاہتے ہیں کہ نیب آپ کو تنگ نہیں کرے گی، آپ کھل کر ملک کی ترقی میں اپنا کلیدی کردار ادا کرتے رہیں۔

انہوں نے کہا کہ نیب میں اصلاحات لا رہے ہیں اور انکوائری اور ویریفکیشن کے عمل کے دوران کسی بھی آفیسر کا میڈیا ٹرائل نہیں کیا جائے گا اور نیب میں اب کوئی بھی فرضی یا گمنام ناموں سے لکھی گئی درخواستوں کو قبول نہیں کیا جائے گا، درخواست گزار آئیں اور ایفیڈیوٹ کے ساتھ درخواست جمع کرائیں۔  بیوروکریٹس بہت پریشر میں کام کر رہے ہیں۔ نیب میں مقدمات ہونے کی وجہ سے تعمیری منصوبے تاخیر کا شکار ہو جاتے ہیں جو نہیں ہونا چاہئے ۔

چیف سیکریٹری سندھ کے آفس میں سہولت کاری ڈیسک کے قیام کا بھی اعلان کرتے ہوئے نزیر احمد نے کہا کہ نیب کے افسران سندھ سیکریٹریٹ کے افسران کے خدشات اور شکایات کو مل بیٹھ کر فوری حل کرنے کی کوشش کریں، کھلی کچہریاں منعقد کر کے عوام کے مسائل سن کر حل کر نے کی کوشش کر رہے ہیں۔