پاکستان اور ایران کے درمیان سفارتی تعلقات معطل، پاکستانی سفیر کو واپس بلا لیا گیا

پاکستان نے ایران سے اپنا سفیر واپس بلانے کا اعلان کر دیا

ترجمان دفتر خارجہ ممتاز زہرا بلوچ نے میڈیا کو بریفنگ دیتے ہوئے کہا ہے کہ پاکستان نے ایران سے اپنا سفیر واپس بلانے کا فیصلہ کرلیا ہے اور پاکستان سے ایرانی سفیر کو واپس اپنے ملک جانے کا کہا ہے۔

ترجمان دفتر خارجہ ممتاز زہرا بلوچ نے بریفنگ دیتے ہوئے کہا کہ پاکستانی حکام نے ایران کے تمام دورے ملتوی کر دیئے ہیں، گزشتہ رات ایران کی طرف سے پاکستان کی خود مختاری کی کھلم کھلا خلاف وزری کی گئی۔ پاکستان اس غیر قانوی اقدام کا جواب دینے کا حق محفوظ رکھتا ہے۔

ممتاز زہرا بلوچ نے کہا کہ پنجگور میں کئے گئے حملے کی تمام تر ذمہ داری ایران پر عائد ہوتی ہے، پاکستان کی خود مختاری پر حملہ یواین چارٹر کی خلاف ورزی اور ایرانی جارحیت کا ثبوت ہے۔ نتائج کی ذمہ داری پوری طرح ایران پر عائد ہو گی، ہم نے یہ پیغام ایرانی حکومت کو پہنچا دیا ہے۔

ترجمان دفترخارجہ نے مزیدکہا کہ ایران کے ساتھ ہونے والی مجوزہ ملاقاتیں بھی منسوخ کردی گئی ہیں، ایران اور پاکستان کے درمیان سفارتی دوروں کو بھی روکا جارہا ہے۔ایران نے جارحیت کو چھپانے کے لیے جیش العدل کے جھوٹے بیانیے کا سہارا لیا۔ ہم نے اپنا پیغام ایرانی حکومت تک پہنچا دیا ہے۔

ترجمان دفتر خارجہ نے کہاکہ پاکستان میں ایرانی سفیر اس وقت ایران کے دورے پر ہیں لہٰذا وی ابھی واپس نہ آئیں، ایران کا یہ غیرقانونی عمل مکمل طور پر ناقابل قبول ہے۔