ہمارے گھروں پر چھاپے مارے جارہے ہیں ،خاندان کا تعاقب کیا جا رہا ہے ،عمر ایوب

اسلام آباد: رہنما پی ٹی آئی عمرایوب نے نامعلوم افراد کی جانب سے ان کے بیٹے اور بھتیجے کا ڈرانے اور دھمکانے  پر ردعمل دیتے ہوئے کہا ہے کہ  ہماری فیملی  کے افراد اور بچوں کو انتخابی مہم کے لیے ووٹرز کے پاس جانے کی اجازت نہیں ہے، کیا یہ لیول پلیئنگ فیلڈ ہے؟ کیا ملک میں ایسے ہی الیکشن ہوتے رہے ہیں ۔ 

انہوں نے کہا کہ اگر ایسے الیکشن کرانا تھا تو قوم کا پیسہ کیوں ضائع کیا بنا الیکشن کروائے ہی قوم کو ان کا وزیر اعظم بتا دیتے ۔ 

عمر ایوب نے  مزید کہا کہ آج ہری پور میں ایک گاڑی  نے میرے 16 سالہ بیٹے کی گاڑی کو روکنے کی بھرپور  کوشش کی، میرا بیٹا بڑی مشکل سے گاڑی کے تعاقب سے باہر نکلا ،وہ میری انتخابی مہم کے لیے جا رہا تھا، میرے 18 سالہ بھتیجے کا نامعلوم افراد کی جانب سے پیچھا کیا گیا جو اپنے والد اور میرے لیے مہم چلا رہے ہیں۔

عمرایوب نے کہا کہ یہ وہ حالات ہیں جن میں پی ٹی آئی کے کارکن اور امیدوار عام انتخابات 2024 کی مہم چلا رہے ہیں، ہم اپنے ووٹرز تک نہیں پہنچ سکتے، ہمارے گھروں پر چھاپے مارے جا رہے ہیں ، توڑ پھوڑ ہو رہی ہے ۔ 

رہنما پی ٹی آئی کے مطابق ہمارے کاغذات نامزدگی چھین کر پھاڑ دیے جاتے ہیں انہوں نے کہا کہ راولپنڈی میں راجہ بشارت کے کاغذات نامزدگی چھین لیے گئے انہوں نے کہا کہ پی ٹی آئی کے ٹکٹ ہولڈرز کو اور اہل خانہ کو ہراساں کیا جاتا ہے۔