پاک ایران کشیدگی، قومی سلامتی کمیٹی کا اجلاس کل دوپہر طلب

پاکستان اور ایران کے درمیان کشیدگی کے معاملے پر قومی سلامتی کمیٹی کا اجلاس کل دوپہر طلب کر لیا گیا،نگران وزیر اعظم انوار الحق کاکڑ اجلاس کی صدرات کریں گے۔ اجلاس میں تینوں سروسز چیفس بھی شرکت کریں گے۔

ذرائع کے مطابق قومی سلامتی کمیٹی کا اجلاس کل بلا لیا گیا ہے جس میں حالیہ پاک ایران کشیدہ صورتحال کو زیر غور لایا جائے گا۔ اجلاس میں چیئرمین جوائنٹ چیفس آف سٹاف کمیٹی،آرمی چیف، نیول اور پاک فضائیہ کے چیف شریک ہوں گے جبکہ اجلاس میں خفیہ اداروں کے حکام بھی شریک ہوں گے۔

اس حوالے سے ذرائع کا کہنا ہے کہ قومی سلامتی کمیٹی کے اجلاس میں امن و امان کی صورتِ حال پر فیصلے ہوں گے۔ علاوہ ازیں پاکستان اور ایران کے درمیان جاری کشیدگی کے معاملے پر نگراں وزیرِ اعظم نے کابینہ کا اجلاس بھی کل دوپہر 2 بجے طلب کیا ہے۔

ذرائع کے مطابق کابینہ اجلاس میں موجودہ ملکی سیکیورٹی کی صورتِ حال اور پاک ایران کشیدگی پر شرکاء کو بریفنگ دی جائے گی۔ پاک ایران کشیدگی پر آئندہ کے لائحہ عمل پر بھی غور ہو گا۔

واضح رہے کہ نگران وزیراعظم انوارالحق کاکڑ آج رات ڈیوس سے پاکستان پہنچیں گے۔