سائفر کیس،بانی چیئرمین پی ٹی آئی کے خلاف جیل ٹرائل کالعدم قراردینے کافیصلہ چیلنج

سائفر کیس، نگران حکومت نے بانی چیئرمین پی ٹی آئی عمران خان کے خلاف جیل ٹرائل کالعدم قراردینے کا اسلام آباد ہائیکورٹ کا فیصلہ سُپریم کورٹ میں چیلنج کردیا۔

وفاق کی جانب سے دائر درخواست میں استدعا کی گئی ہے کہ اسلام آباد ہائیکورٹ کا21 نومبر2023 کا فیصلہ کالعدم قراردیا جائے۔

درخواست میں موقف اپنایا گیا ہے کہ اسلام آباد ہائیکورٹ نے حقائق کا جائزہ نہیں لیا، ہائیکورٹ نے سائفرٹرائل کیلئے قائم خصوصی عدالت کو کالعدم قرار دیا جبکہ ہائیکورٹ کے پاس خصوصی عدالت کی حیثیت ختم کرنے کا اختیارنہیں ہے۔

حکومت کی جانب سے وکیل راجا رضوان عباسی کے توسط سے دائر کی جانے والی اس درخواست میں عمران خان اور جج ابو الحسنات کو فریق بنایا گیا ہے ۔

اس کے علاوہ درخواست میں ڈی جی ایف آئی اے،آئی جی، ڈی سی،چیف کمشنر اسلام آباد سمیت دیگر کو بھی فریق بنایا گیا ہے۔