پاکستان اور ایران کے درمیان کشیدگی کے بعد مثبت پیغامات کا تبادلہ

پاکستان اور ایران کے درمیان کشیدگی کے بعد مثبت پیغامات کا تبادلہ ہوا ہے۔ ترجمان دفتر خارجہ نے پاکستان اور ایران کے درمیان مثبت پیغامات کے تبادلے کی تصدیق کی۔

پاکستان کے ایڈیشنل سیکرٹری خارجہ رحیم حیات قریشی نے ایرانی ہم منصب سید رسول موسوی کو جواب دیا کہ آپ کے جذبات کا جواب دیتا ہوں پیارے بھائی رسول موسوی۔

ایڈیشنل سیکرٹری خارجہ نے ایرانی سفارتکار سے کہا کہ پاکستان اور ایران کے برادرانہ تعلقات ہیں، مثبت بات چیت کے ذریعے تمام مسائل کو حل کرنے کے لیے آگے بڑھیں گے، دہشت گردی سمیت ہمارے مشترکہ چیلنجز کے لیے مربوط کارروائی کی ضرورت ہے۔

ایرانی سفارتکار نے کہا کہ دونوں ممالک کے رہنما اور اعلیٰ حکام جانتے ہیں حالیہ تناؤ کا فائدہ دشمنوں اور دہشتگردوں کو ہو گا، آج مسلم دنیا کا اہم مسئلہ غزہ میں صیہونیوں کے جرائم بند کرنا ہے۔

یاد رہے کہ ایران نے پاکستان کے صوبے بلوچستان کے سرحدی علاقے میں فضائی حدود کی کارروائی کرتے ہوئے حملہ کیا جس پر پاکستان نے شدید احتجاج کیا اور اگلے ہی روز پاک فوج نے زور دار جواب دیتے ہوئے ایرانی علاقے میں کالعدم تنظیموں کے دہشتگردوں کے ٹھکانوں کو کامیابی سے نشانہ بنایا ۔