سپریم کورٹ وفاق کے نہیں بلکہ آئین کے تابع ہے، چیف جسٹس آف پاکستان

چیف جسٹس پاکستان جسٹس قاضی فائز عیسیٰ کا کہنا ہے کہ سپریم کورٹ حکومت کے نہیں بلکہ آئین کی شق 19 اے کے تابع ہے۔

سپریم کورٹ میں اعلیٰ عدلیہ کی رپورٹنگ کرنے والے صحافیوں کی تربیتی ورکشاپ سے خطاب کرتے ہوئے چیف جسٹس نے کہا کہ آئین کی شق 19 میں آزادی صحافت کا ذکر ہے۔ معلومات بہت موثر ہتھیار ہے، معلومات سے ہی احتساب کا عمل شروع ہوتا ہے۔ جو ادارے وفاقی حکومت کے تابع ہیں ان پر معلومات فراہم کرنا قانونا لازم ہے۔

انہوں نے کہا کہ کورٹ رپورٹر عدالتی کارروائی عوام تک پہنچانے کا ذریعہ ہے۔ ہر شہری کا بنیادی حق ہے کہ وہ معلومات حاصل کر سکے۔ آئین کی شق 19 اے معلومات فراہم کرنے کے بنیادی حق سے متعلق ہے۔ عوامی پیسوں سے چلنے والا ہر ادارہ عوام کو جواب دہ ہے۔ ہم خود کیوں نہ عوام کو بتائیں کہ ہم کیا کر رہے ہیں۔

چیف جسٹس کا کہنا ہے کہ کوشش ہے کہ کم س کم وقت میں زیادہ سے زیادہ کیسز نمٹائیں۔ عدالت عظمی عوام کے پیسوں پر چل رہی ہے۔

جسٹس قاضی فائز عیسیٰ نے کہا کہ اب ہرشہری پر معلومات کی فراہمی حق بن چکا ہے، اب یہ ہمارا حق نہیں کہ آپ کو کچھ دکھائیں یا نہ دکھائیں۔ایک شہری کی حیثیت سے معلومات تک رسائی آپ کا استحقاق ہے۔جو ادارہ معلومات نہیں دیتا، اسے اب بتانا ہوگا کہ کیوں نہیں دے رہا۔

جسٹس قاضی فائز عیسیٰ نے کہا کہ مثبت روشنی دکھا کر معاشرہ تبدیل کیا جاسکتا ہے، عوام کو ان کے پیسوں سے چلنے والے ادارے سے متعلق معلومات ہونا چاہئیں۔