پاکستان اورایران کی جانب سے  کشیدگی کے خاتمے پراتفاق

پاکستان اورایران کی جانب سے  کشیدگی کے خاتمے پراتفاق کیا گیا ہے۔

یہ اتفاق رائے وزیرخارجہ جلیل عباس جیلانی اوران کے ایرانی ہم منصب حسین امیرعبداللہیان کے درمیان ٹیلی فون پر گفتگوکے دوران ہوا۔

دونوں ملکوں کے درمیان قریبی برادرانہ تعلقات پرزوردیتے ہوئے وزیرخارجہ نے ایران کے ساتھ باہمی اعتماد اورتعاو ن کے جذبے سے کام کرنے کے بارے میں پاکستان کی خواہش کا اظہار کیا۔

دونوں وزرائے خارجہ نے اسی بات پراتفاق کیا ہے کہ انسداددہشتگردی اوردوسرے متعلقہ شعبوں میں تعاون اورقریبی روابط کومستحکم کیاجاناچاہئے۔ 

یاد رہے کہ ایران کی جانب سے پاکستانی فضائی حدود کی خلاف ورزی کی گئی اور ایران کی جانب سے پاکستان کے صوبہ بلوچستان میں میزائل فائر کیے گئے ،  فائر کیئے جانے والے میزائل بلوچستان کے ایران سے متصل ضلع پنجگور میں سبزکوہ کے علاقے میں گرے ہیں جب کہ جس علاقے میں یہ میزائل گرے ہیں وہ آبادی والا علاقہ ہے۔