مسلم لیگ ن کی قیادت نے سردار مہتاب عباسی کو پارٹی سے نکال دیا

پاکستان مسلم لیگ (ن) کے صدر شہباز شریف نے سردار مہتاب احمد عباسی کو پارٹی سے نکال دیا۔

سابق گورنرخیبر پختونخواہ سردار مہتاب احمد خان نے این اے 17 میں اپنے 35 سال کے حریف سابق وفاقی وزیر امان اللہ خان جدون کے بیٹے اور پی ٹی آئی کے حمایت یافتہ امیدوار علی خان جدون کی حمایت کا اعلان کیا تھا۔

مسلم لیگ ن نے سینئر لیگی رہنماء سردار مہتاب عباسی کی پارٹی رکنیت ختم کر دی، سردارمہتاب عباسی کو پارٹی ڈسپلن کی خلاف ورزی پر نکالا گیا۔جنرل سیکرٹری ن لیگ احسن اقبال نے نوٹیفکیشن جاری کر دیا۔

واضح رہے کہ ایک روز قبل ایبٹ آباد کے حلقہ این اے 17 کی سیاست میں بڑا اپ سیٹ ہوا تھا، مسلم لیگ (ن) کے ناراض رہنما سابق وزیراعلی سردار مہتاب احمد خان نے این اے 17 میں اپنے 35 سال کے حریف سابق وفاقی وزیر امان اللہ خان جدون کے بیٹے پاکستان تحریک انصاف کے حمایت یافتہ امیدوار علی خان جدون کی حمایت کا اعلان کر دیا تھا۔

سردار مہتاب احمد خان این اے 16 ایبٹ آباد 1 سے آزاد حیثیت سے الیکشن لڑ رہے ہیں جبکہ ایبٹ آباد کے صوبائی حلقوں سے بھی مسلم لیگ ن کے امیدواروں کے خلاف آزاد حیثیت سے بھی اپنے امیدوار کھڑے کئے ہوئے ہیں۔

سردار مہتاب احمد خان حلقہ این اے 16 سے سابق ڈپٹی اسپیکر مرتضی جاوید عباسی جو پاکستان مسلم لیگ ن کے صوبائی جنرل سیکرٹری ہیں کا مقابلہ کر رہے ہیں۔