تمام مفروضے اور افواہیں دم توڑ چکی، انتخابات 8 فروری کو ہی ہوں گے، نگران وزیر اطلاعات

نگران وفاقی وزیر اطلاعات، نشریات و پارلیمانی امور مرتضیٰ سولنگی نے کہا ہے کہ انتخابات کے انعقاد کے حوالے سے تمام مفروضے اور افواہیں دم توڑ چکی ہیں، 8 فروری 2024ءکو صبح 8 بجے پولنگ اسٹیشنز کھلیں گے اور پاکستان کے عوام اپنے ووٹ کا حق استعمال کریں گے۔

پاکستان انسٹیٹیوٹ آف ڈویلپمنٹ اکنامکس (پائیڈ) کے زیر اہتمام اصلاحاتی منشور کے اجراءکی تقریب سے خطاب کرتے ہوئے وفاقی وزیر اطلاعات نے کہا کہ 17 اگست 2023ءکو نگران کابینہ کے حلف اٹھانے کے بعد سے مسلسل یہی کہہ رہے ہیں کہ انتخابات اپنے مقررہ وقت پر ہوں گے اور الیکشن کمیشن کو معاونت فراہم کرنا ہماری ذمہ داری ہے، انتخابات کے بروقت انعقاد کے حوالے سے کسی کو شک و شبہ نہیں ہونا چاہئے۔

انہوں نے کہا کہ انتخابات کے انعقاد کے حوالے سے میڈیا کی ذمہ داری پہلے سے زیادہ بڑھ جاتی ہے، میڈیا کو اس ضمن میں ذمہ دارانہ رپورٹنگ کرنا ہوگی۔ ملک کو معیشت، خارجہ پالیسی، ٹیکس اصلاحات، صحت، تعلیم اور آبادی میں اضافے جیسے مسائل اور چیلنجز درپیش ہیں، زراعت ملک کی جی ڈی پی کا ایک چوتھائی حصہ ہے لیکن اس شعبہ سے ٹیکس کی وصولی بہت کم ہے۔

نگران وزیر اطلاعات نے کہا کہ قومی و صوبائی اسمبلیوں کے ارکان کا اصل کام قانون سازی اور ملک کے پیچیدہ مسائل کو حل کرنا ہے، دعوؤں اور وعدوں کی تکمیل سیاسی جماعتوں کا کام ہے۔ سیاسی جماعتوں کے اندر جمہوری رویوں کی ضرورت ہے، کچھ دن پہلے ایک عدالتی فیصلے سے ایک نظیر قائم ہوئی ہے کہ جماعتوں کے اندر انتخابات اور جمہوری رویے ہونے چاہئیں۔