بانی چیئرمین پی ٹی آئی کا انتخابی مہم سے متعلق جیل سے خصوصی پیغام

بیرسٹر علی ظفر نے اڈیالہ جیل کے باہر میڈیا سے گفتگو کرتے ہوئے کہا ہے کہ بانی چیئرمین پی ٹی آئی عمران خان نے اہم پیغام دیا ہے کہ اتواز سے ہمارے تمام امیدوار اپنی اوپن انتخابی مہم کا آغاز کر دیں۔

اڈیالہ جیل کے باہر میڈیا سے گفتگو کرتے ہوئے بیرسٹر علی ظفر نے بتایا کہ عمران خان نے کہا ہے، الیکشن رزلٹ میں پی ٹی آئی جیتے گی، عمران خان نے اپنے پیغام میں کہا کہ عوام کو آزادی اور قانون کی حکمرانی کے لئے لڑنا ہے۔

بیرسٹر علی ظفر نے مزید کہا کہ خان صاحب نے کہا ہے کہ اتوار کو سارے امیدوار باہر نکل کر اوپن مہم کا آغاز کریں، عوام اپنی آزادی کےلئے پی ٹی آئی امیدواروں کو ووٹ کرے۔ جب حکومت بنائیں گے تو قانون کی بالا دستی اور حکمرانی کے لئے کام کریں گے۔

انہوں نے کہا کہ اگر پوری قوم اپنی آزادی کےلئے ووٹ کریں گے، حالانکہ پی ٹی آئی کوانتخابی نشان الاٹ نہیں کیا گیا لیکن عوام کو پتا کہ کو کون کون سے امیدواروں کا تعلق تحریک انصاف سے ہے، عوام انہیں ووٹ کر کے کامیاب کرائیں تاکہ ہم ایک جمہوری حکومت بنانے میں کامیاب ہو جائیں۔

عمران خان کا کہنا ہے کہ  معاشرے میں قانون کی بالا دستی بہت ضروری ہے ، جس طرح قانون کو توڑ مروڑ کر کسی کے خلاف استعمال کیا جاتا ہے۔ اس لئے انہوں نے کہا ہے کہ جب ہم حکومت بنائے گے تو سب سے پہلے قانون کی حکمرانی اور انسانی بنیادی حقوق پر بھرپور کام کریں گے۔