عدلیہ مخالف مہم چلانے والوں کے خلاف کارروائی کی جائے گی ،مرتضی سولنگی

نگران وزیر اطلاعات و نشریات مرتضیٰ سولنگی نے کہا ہے کہ سپریم کورٹ کے ججوں کے خلاف حالیہ مذموم مہم چلانے والوں کے خلاف قانون اور آئین کے مطابق کارروائی کی جائے گی۔

اسلام آباد میں پاکستان ٹیلی کمیونیکیشن اور وفاقی تحقیقاتی ادارے کے حکام کے ساتھ ایک پریس کانفرنس میں انہوں نے کہا کہ وزارت داخلہ نے اس معاملے کی تحقیقات کیلئے اس ماہ کی سولہ تاریخ کو ایک مشترکہ تحقیقاتی ٹیم کا نوٹیفکیشن جاری کیا تھا۔

انہوں نے کہا ایف آئی اے، پی ٹی اے اور دیگر متعلقہ ادارے اپنی تحقیقات جاری رکھے ہوئے ہیں اور اِس سلسلے میں کئی سوشل میڈیا اکائونٹس کی نگرانی کی جا رہی ہے ، انہوں نے ملک میں اور بیرون ملک موجود عناصر کو خبردار کیا کہ وہ ایسی سرگرمیوں سے باز رہیں۔

ڈی جی پی ٹی اے احمد شمیم پیرزادہ نے کہا انہیں توہین آمیز مواد کو ختم یا بلاک کرنے کا اختیار حاصل ہے۔

ڈائریکٹر آپریشن ایف آئی اے وقار الدین سید نے کہا کہ وہ پوری طرح باخبر ہیں اور ریاست اور اداروں کے خلاف مذموم مہم چلانے والوں کے خلاف فوری کارروائی یقینی بنائی جائے گی۔

انہوں نے کہا ہم سپریم کورٹ کے ججوں کے خلاف حالیہ مہم میں ملوث سوشل میڈیا اکائونٹس کا پتہ چلا رہے ہیں۔

ڈائریکٹر آپریشنز ایف آئی اے نے کہا کہ کسی کو ریاستی اداروں کے ذمہ داران کی ساکھ کو نقصان پہنچانے کی اجازت نہیں دی جائے گی۔