پی ٹی آئی کا الیکشن میں دھاندلی کے خلاف گرینڈ الائنس بنانے کا فیصلہ

پاکستان تحریک انصاف کے رہنما اور اپوزیشن لیڈر عمر ایوب نے کہا کہ آج ہم عدالتی حکم کے ساتھ بانی پی ٹی آئی سے ملاقات کرنے آئے ہیں لیکن ہمیں جیل سپرنٹنڈنٹ اسد وڑائچ نے ملاقات نہیں کرنے دی، جیل سپرنٹنڈنٹ کے خلاف تحریک استحقاق جمع کرائیں گے۔

اڈیالہ جیل راولپنڈی کے باہراسد قیصر کے ہمراہ میڈیا سے گفتگو کرتے ہوئے عمر ایوب نے کہا کہ بانی پاکستان تحریک انصاف (پی ٹی آئی) عمران خان نے مجھے اپوزیشن لیڈر نامزد کیا ہے، آج ہم عدالتی حکم کے ساتھ اپنے لیڈر سے ملاقات کرنے آئے، ہمیں جیل سپرنٹنڈنٹ اسد وڑائچ نے ملاقات نہیں کرنے دی، جیل سپرنٹنڈنٹ کے خلاف تحریک استحقاق جمع کرائیں گے۔

اس موقع پر پی ٹی آئی رہنما اسد قیصر نے کہا کہ ہم الیکشن میں دھاندلی کے خلاف گرینڈ الائنس بنانے جا رہے ہیں اور فارم 45 کے مطابق جو ہمارے لوگ الیکشن جیت چکے ہیں انہں پارلیمانی اجلاس میں بلائیں گے کیونکہ عوام نے انہیں مینڈیٹ دیا ہے، یہ ملک بھیڑ بکریوں کی طرح نہیں چل سکتا۔ دھاندلی کے خلاف فارم 47 سے فائدہ اٹھانے والی سیاسی جماعتوں کے سوا تمام جماعتوں کا گرینڈ الائنس بنائیں گے اور جب تک ان جعلی فارم 47 والوں کو اسمبلی سے باہر نہیں نکال دیتے سکون سے نہیں بیٹھیں گے ۔ 

عمرایوب نے کہا کہ میرے ساتھ ایم این ایز حضرات موجود ہیں، شہبازشریف نے فلور آف دی ہاؤس پر رول آف لاء کی بات کی تھی، میرا شہبازشریف سے سوال ہے کہاں ہے آپ کا رول آف لا، جہاں قانون کی بالادستی نہیں ہوگی وہ ملک نہیں چل سکتا ہے، ہم قانون کے مطابق جیل سپرنٹنڈنٹ کو اسمبلی فلور پر بلائیں گے۔ اڈیالہ جیل سپریڈنٹ اسد وڑائچ عدالتی احکامات کو مسترد کرکے خود کو قانون سے بالاتر سمجھ رہا ہے- ہم اسکی شدید الفاظ میں مذمت کرتے ہے, جہاں پر قانون کی حکمرانی آئین کی بالادستی نہیں ہوگی وہ ملک نہیں چل سکتا

اسد قیصر نے کہا کہ یہ لوگ مفاہمت کی بات کرتے ہیں، کس قسم کی مفاہمت، جب آپ کے ہمارا مینڈیٹ چوری کیا ہے۔ ان کو عوام نے منتخب ہی نہیں کیا اور ان کے پاس یہ اختیار ہی نہیں کہ یہ وزی اعظم بنے اور کابینہ تشکیل دیں۔ ہم ان تمام پارٹیوں کا اکٹھا کریں گے جن کے ساتھ الیکشن میں دھاندلی ہوئی ہے۔یہ ملک ہمارا ہے اسے آئین و قانون کے مطابق ہی چلنا ہو گا۔ ہمیں عمران خان سے ملاقات نہیں کرنے دی گئی جس کی ہم مذمت کرتے ہیں۔