متعدد بار ڈیل کی آفر ہوئی لیکن ہم تمام کیسز کا سامنا کریں گے، علیمہ خان

 بانی پی ٹی آئی عمران خان کی بہن علیمہ خان کا کہنا ہے کہ متعدد بار ڈیل کے پیغامات بھیجے گئے کہ عمران خان اگر چپ کرکے سائیڈ پر ہوجائے تو رہائی مل جائے گی لیکن ہم تمام کیسز کا سامنا کریں گے۔

لاہور میں انسداد دہشتگردی عدالت کے باہر میڈیا سے گفتگو کرتے ہوئے علیمہ خان نے کہا کہ ان لوگوں نے اپنی ڈیوٹی سمجھ رکھی ہے کہ عمران خان کو جیل سے نہیں نکلنے دینا۔ ہم بھی  تفتیشی افسران کو ساتھ لے کر پہلے ن لیگ کے دفتر جائیں گے جس دفتر کا ہم پر الزام ہے کہ ہم نے جلایا ہے اور پھر ہم کلمہ چوک سے ہوتے ہوئے کور کمانڈر ہاؤس جائیں گے اور CCTV ویڈیوز حاصل کریں گے۔

انہوں نے کہا کہ عمران خان کو آنکھ کا انفیکشن ہوا تھا، سپرنٹنڈنٹ کو ہمیں بتانا چاہئے تھا تاکہ ہم اپنے ڈاکٹرز کا بندوبست کرتے کیونکہ ہمیں جیل میڈیکل چیک اپ پر اعتماد نہیں، بانی چیئرمین کے چیک اپ کے لئیے ہم نے ڈاکٹر فیصل سلطان ڈاکٹر عاصم یوسف کی درخواست کورٹ میں دائر کی ہے تاکہ وہ عمران خان سے ملاقات کرکے انکا چیک اپ کرسکیں، سپریڈنٹ اڈیالہ جیل اسد وڑائچ کہتا ہے کہ کوئی ملاقات نہیں کرسکتا کیونکہ اوپر سے اداروں کے احکامات ہے

علیمہ خان نے مزید کہا کہ متعدد بار ڈیل کے پیغامات بھیجے گئے کہ عمران خان اگر چپ کرکے سائیڈ پر ہوجائے تو رہائی مل جائے گی جبکہ عمران خان کا مؤقف واضح ہے کہ ہمارا چوری کیا گیا مینڈیٹ، وہ مینڈیٹ جو عوام نے ہمیں دیا وہ واپس کیا جائے تاکہ معیشت بہتری کی جانب گامزن ہو ورنہ معیشت مزید تباہی کی طرف جائے گی اور لوگ مزید غربت کی لکیر سے نیچے چلے جائیں گے۔

انہوں نے کہا کہ تفتیشی افسر کئی ماہ گزرنے کے باوجود تفتیش مکمل نہیں کرسکا، جناح ہاؤس حملہ کیس کی سماعت پر آئے تو جج ہی موجود نہیں۔ کبھی تفتیشی افسر نہیں آتا تو کبھی جج نہیں آتے، لوگوں کو 9 ماہ سے تنگ کیا جا رہا ہے، تفتیش مکمل نہیں ہو رہی۔