اسلام آباد سے کوئٹہ جانیوالی پرواز سے پرندہ ٹکرا گیا

اسلام آباد سے کوئٹہ جانیوالی پرواز پی کے 325 سے پرندہ ٹکرا گیا، جس سے پرواز کو معمولی نقصان پہنچا ، تمام مسافر محفوظ رہے۔

ترجمان پی آئی اے کے مطابق پی آئی اے کی پرواز پی کے 325 اسلام آباد سے کوئٹہ کے لیے روانہ ہوئی تو بلندی پکڑنے کے دوران طیارے کے انجن نمبر 2 سے پرندہ ٹکرا گیا۔ پرندہ ٹکرانے سے پرواز کو جزوی نقصان پہنچا.

ائیر ٹریفک کنٹرول سے رابطہ کرنے پر اے ٹی سی نے پائلٹ کو واپس لینڈ کرنے کی ہدایت کی اور ائیر بس اے 321 طیارہ نے ٹیک آف کے 50 منٹ بعد اسلام آباد ائیر پورٹ پر باحفاظت لینڈنگ کی۔

ترجمان نے بتایا کہ پرندہ ٹکرانے سے انجن کے بلیڈز کو نقصان پہنچا ہے جس وجہ سے طیارے کو گراؤنڈ کردیا گیا اور مسافروں کو متبادل طیارے سے منزل پر روانہ کیا گیا جبکہ کوئٹہ ائیرپورٹ پر پرواز پی کے 326 کے مسافروں کی روانگی کئی گھنٹے تاخیر کا شکار  ہوئی۔

ترجمان نے مزید بتایا کہ انجینئرز کی ٹیم انجن کی مرمت کا کام کرر ہی ہے۔