شام میں ترکی کی سرحد کے قریب قصبے کار بم دھماکہ، 7افراد ہلاک اور متعدد زخمی

شام میں ترکی کی سرحد کے قریب صوبہ حلب کے قصبے عزاز کے مرکزی بازار میں ہونے والے کار بم دھماکے سے 7افراد ہلاک اور متعدد زخمی ہوگئے ہیں۔

غیر ملکی خبر رساں ادارے کے مطابق شام میں کام کرنے والے رضاکارانہ امدادی گروپ وائٹ ہیلمٹس نے میڈیا کو بتایا کہ عزاز کے مرکزی بازار میں جب بم پھٹا تو خریدار عید الفطر سے پہلے اپنے بچوں کے لیے نئے کپڑے خریدنے میں مصروف تھے۔انہوں نے بتایا کہ مقامی ریسکیو اداروں نے ہلاک اور زخمی ہونے والوں کو قریبی ہسپتالوں میں منتقل کردیا ہے۔

انہوں نے مزید بتایا کہ یہ واضح نہیں ہے کہ اس قصبے میں حملہ کس نے کیا اور نہ ہی کسی گروپ کی طرف سے حملے کی ذمہ داری قبول کی گئی ہے۔واضح رہے کہ شام کے شمال مغربی سرحدی علاقے بشمول تعز میں بھیڑ بھرے شہری علاقوں کو نشانہ بنانا کوئی غیر معمولی بات نہیں ہے اس سے قبل 2017 میں قصبے کے کورٹ ہاؤس کے باہر ایک کار بم دھماکے میں 40 سے زائد افراد ہلاک ہو گئے تھے۔