وزیرداخلہ نے شمالی وزیرستان میں پاسپورٹ آفس کا افتتاح کردیا

تفصیلات کے مطابق وفاقی وزیرِ داخلہ شیخ رشید شمالی وزیرستان کے دورے پر ہیں ،  میران شاہ پہنچنے پر علاقے کے مسائل کے حوالے سے بریفنگ دی گئی۔ قبائلی عمائدین نے وزیرداخلہ شیخ رشید احمد کوخوش آمدید کہا اور شمالی وزیرستان میں پاسپورٹ کا دفترکھولنے پروزیرداخلہ شکریہ ‏ادا کیا‎ ‎۔عمائدین نے افواج پاکستان کوقیام امن اورعلاقائی ترقی کے حوالے سے زبردست خراج ‏تحسین پیش کیا‎ ‎ ۔ اس موقع پر خطاب کرتے ہوئے  وزیرداخلہ نے کہاکہ قبائلی عوام نے پاک افواج کے شانہ نشانہ جانوں کی قربانیاں دے کر پاکستان کو بچایا ، افواج پاکستان سے مل کر علاقے میں پائیدار امن اور ترقی میں کردار ادا کرنے پر ‏عمائدین کےشکرگزارہیں، آپ نے پاکستان کے بقا کی جنگ لڑی، پوری قوم کو آپ پر ناز ہے، شمالی وزیرستان میں میڈیکل یونیورسٹی کیلئےصوبائی حکومت اوروزیراعظم سے ‏بات کروں گا،  علاقے میں لوگوں سے جرگہ منعقد کرنے کیلئےبھی وزیراعظم سے بات کروں گا۔

شیخ رشید نے کہا کہ شمالی وزیرستان میں پاسپورٹ دفتر کا افتتاح کردیا ہے، پاسپورٹ اور نادرا کے دفاتر میں مقامی اسٹاف کو بھرتی کیا جائےگا، شناختی کارڈز کے فوری اجراء کے لیے انتظامات کررہاہوں جبکہ پاک افغان بارڈرپرآمد ورفت کیلئےامیگریشن کو آسان بنایا جائےگا۔ شیخ ‏رشید نے عمائدین کو   نادرارجسٹریشن کیلئےفوری طور پر 2موبائل وینز فراہم  کرنے کی بھی یقین دہانی‏ کروائی ۔