وزیرداخلہ محسن نقوی کی اٹلی کے ہم منصب سے ملاقات، اہم امور پر تبادلہ خیال

 وفاقی وزیرداخلہ و انسداد منشیات محسن نقوی اور وفاقی وزیر اوورسیزپاکستانیز چودھری سالک حسین نے اٹلی کے کے وزیر داخلہ میٹیو پینٹے ڈوسی سے ملاقات کی ہے جس میں انسانی سمگلنگ اور غیر قانونی امیگریشن بارے اقدامات پر بات کی گئی۔

وفاقی وزیرداخلہ و انسداد منشیات محسن نقوی اور وفاقی وزیر اوورسیزپاکستانیز چودھری سالک حسین اٹلی کی وزارت داخلہ پہنچے جہاں اطالوی وزارت داخلہ کے اعلیٰ حکام نے وفاقی وزراء کا پرتپاک خیر مقدم کیا ۔

وفاقی وزراء محسن نقوی اور چودھری سالک حسین کی اٹلی کے وزیر داخلہ میٹیو پینٹے ڈوسی سے ملاقات کی ، جس میں غیر قانونی امیگریشن اور انسانی سمگلنگ روکنے کے لئے مشترکہ اقدامات پر تبادلہ خیال کیا گیا ۔

ملاقات میں انسداد منشیات اور بارڈر سکیورٹی کے حوالے سے تعاون پر بھی تفصیلی بات چیت کی گئی جبکہ غیر قانونی تارکین وطن اور انسانی سمگلنگ کیخلاف مربوط اور مؤثر لائحہ عمل پر اتفاق کیا گیا۔

ملاقات میں مشترکہ طور پر قریبی کوآرڈینیشن کے تحت کام کرنے کا فیصلہ کیا گیا، انسداد منشیات اور بارڈر سیکورٹی کے لئے مشترکہ اقدامات اٹھائے جائیں گے جبکہ انسداد منشیات اور انسانی سمگلنگ روکنے کےلئے اٹلی کا پاکستانی بارڈرز کو محفوظ بنانے کیلئے معاونت پر غور کیا گیا، اطالوی ٹیم اس ضمن میں جلد پاکستان کا دورہ کرے گی۔

وفاقی وزیرداخلہ محسن نقوی نے اٹلی میں قید 146 پاکستانیوں کے حوالے سے بھی بات کی اور 42 پاکستانی قیدیوں کو پاکستان کے حوالے کرنے کا مطالبہ کیا۔

 وزیرداخلہ نے اطالوی ہم منصب کو پاکستان کے دورے کی دعوت دیتے ہوئے کہا کہ مضبوط باہمی اشتراک کار انسانی سمگلنگ روکنے، انسداد منشیات اور بارڈر سکیورٹی کے لئے مددگار ثابت ہو گا۔

ان کاکہنا تھا کہ غیر قانونی طور پر اٹلی جانے والے پاکستانیوں کا داخلہ روکنے اور انسداد منشیات کے لئے ہر سطح پر اقدامات کئے گئے ہیں، انسانی سمگلنگ اور ڈرگ مافیا کے خلاف زیرو ٹالرنس کی پالیسی اپنائی ہے، اٹلی پاکستان سے ہنر مند افرادی قوت سے بھرپور فائدہ اٹھا سکتا ہے۔

اس موقع پر چودھری سالک حسین کاکہنا تھا کہ اٹلی پاکستان کے ساتھ ہنرمند افرادی قوت کے زیر التوا معاہدہ کو جلد حتمی شکل دے تاکہ غیر قانونی امیگرنٹس کی حوصلہ شکنی ہو۔

اطالوی وزیرداخلہ نے انسانی سمگلنگ کی روک تھام اور انسداد منشیات کیلئے وفاقی وزیرداخلہ محسن نقوی کے اقدامات کو سراہا اور انسداد منشیات، بارڈر سکیورٹی اور انسانی سمگلنگ روکنے کے لئے تعاون کی یقین دہانی کروائی۔

ملاقات میں اطالوی وزیر داخلہ اٹلی میں پاکستان کے سفیر علی جاوید، اطالوی وزارت داخلہ کے اعلیٰ حکام بھی اس موقع پر موجود تھے۔