فیصل کریم کنڈی گورنر بننے کے بعدکے پی میں کم جبکہ سندھ اور پنجاب میں زیادہ دکھائی دیتے ہیں، بیرسٹر سیف

پی ٹی آئی رہنما اور مشیر اطلاعات خیبر پختونخوا بیرسٹر محمد علی سیف نے کہا ہے کہ گورنر فیصل کریم کنڈی کبھی پنجاب اور کبھی سندھ سے نمودار ہوتے ہیں۔

تفصیلات کےمطابق مشیراطلاعات خیبرپختونخوا بیرسٹر سیف کا کہنا تھا کہ فیصل کریم کنڈی گورنر بننے کے بعد خیبر پختونخوا میں کم جبکہ سندھ اور پنجاب میں زیادہ دکھائی دیتے ہے اور اٹک پار بیٹھ کر خیبر پختونخوا پر تنقید کرتے ہیں۔

مشیر اطلاعات کا کہنا تھا کہ اگر گورنر کو واقعی یونیورسٹیوں کی فکر ہے تو وزیراعلیٰ گنڈاپور سے بیٹھ کر مسئلے کا حل نکالیں، پنجاب اور سندھ کے شہروں سے میڈیا پر نمودار ہوکر بیان بازی سے کچھ نہیں ہوتا۔

بیرسٹرسیف کا مزید کہنا تھا کہ گورنر کی خدمت میں عرض ہے کہ پی ٹی آئی نے صوبے میں تیسری بار حکومت بنائی ہے اور یہ حکومتیں کارکردگی کے بل بوتے پر بنائی ہے۔

انہوں نے مزید کہا کہ خیبر پختونخوا کی عوام ایک سے زیادہ مواقع کسی بھی پارٹی کو نہیں دیتی ہے، پیپلز پارٹی سمیت تمام پارٹیاں خیبر پختونخوا میں قصہ پارینہ بن چکے ہیں، گورنر صحت کارڈ کی اہمیت ان سے پوچھے جن کا علاج ہوا ہے، آپکی لیڈر شپ سردرد کے لئے بھی دبئی اور لندن جاتے ہیں۔