متنازع ویڈیو، عمر ایوب کا معاملے کو پارلیمان میں اٹھانے اور عدالت کے روبرو چیلنج کرنے کا اعلان

تحریک انصاف نے حمود الرحمٰن کمیشن رپورٹ پر ایف آئی اے کے نوٹس کے معاملے کو پارلیمان میں اٹھانے اور عدالت کے روبرو چیلنج کرنے کا اعلان کر دیا۔

پاکستان تحریک انصاف (پی ٹی آئی) کے رہنما عمر ایوب نے عمران خان کی متنازع ویڈیو پوسٹ کے معاملے پر نوٹس کا جواب دیتے ہوئے وفاقی تحقیقاتی ادارے (ایف آئی اے) سے حمود الرحمان کمیشن رپورٹ کی کاپی مانگ لی۔

قومی اسمبلی میں اپوزیشن لیڈر عمر ایوب خان نے ایف آئی اے کے نوٹس کا تحریری جواب بھیجا، عمر ایوب خان نے ایف آئی اے کو نوٹس کا جواب تحریری طور پر بھجوا دیا ہے، جواب ڈاکٹر بابر اعوان کی وساطت سے بھجوایا گیا۔

ایف آئی اے کو بھیجے گئے جواب میں کہا گیا ہے کہ ایف آئی اے نے ہتک آمیز نوٹس بھجوایا ہے جس میں مبہم، مشکوک اور غیر قانونی سوالات پوچھے گئے ہیں۔ یہ نوٹس سقوط ڈھاکہ سے متعلق واقعات سے متعلق ہے جس پر حکومت نے کمیشن قائم کیا ہے۔ کمیشن نے 1972 میں عبوری رپورٹ پیش کی اور 1974 میں مکمل کی۔

جواب میں کہا گیا کہ حمود کمیشن رپورٹ کو نہ تو مسترد کیا گیا اور نہ ہی اس کے مندرجات کی تردید کی گئی۔ کمیشن نے جنرل یحییٰ خان اور جنرل امیر عبداللہ نیازی کے بیانات قلمبند کئے۔

سیکرٹری جنرل پی ٹی آئی نے جواب میں کہا کہ ایف آئی اے نہ تاریخ دانوں کا محکمہ ہے اور نہ ہی عدالتوں سے بالا کوئی ادارہ، نوٹس کا مقصد بانی پی ٹی آئی اور پارٹی سیکرٹری جنرل کو انتقام کا نشانہ بنانا ہے۔

تحریری جواب میں مزید کہا گیا ہے کہ وہ نوٹس کے ذریعے کیے گئے پروپیگنڈے کے معاملے کو پارلیمنٹ میں اٹھانے اور نوٹس کو عدالت میں چیلنج کرنے کا حق استعمال کریں گے۔

اپنے جواب میں عمر ایوب نے کہا کہ حمود الرحمان کمیشن کی رپورٹ کابینہ ڈویژن میں موجود ہے، ایف آئی اے جواب تیار کرنے کے لیے اس کی کاپی فراہم کرے۔