گوادر : گوادر کے علاقے پسنی حور میں نامعلوم افراد نے فشریز ڈیپارٹمنٹ کی تحویل میں لیے گئے ٹرالروں کو آگ لگا دی۔ 
ذرائع کے مطابق گوادر میں فشریز ڈیپارٹمنٹ نے دو ٹرالروں کو غیر قانونی شکار کرنے کی پاداش میں رنگے ہاتھوں پکڑ کر تحویل میں لیا تھا۔ بعد ازاں عدالتی حکم پر دونوں ٹرالروں کی نیلامی کی جانی تھی۔ 
اس سے پہلے کہ تحویل میں لیےگئے ٹرالروں کی نیلامی کی جاتی، نا معلوم افراد نے رات کی تاریکی میں حملہ کیا اور فشریز سیکیورٹی گارڈ کو یرغمال بنا لیا۔ 
نامعلوم افراد نے حملے کے دوران تحویل میں لیے گئے دونوں ٹرالروں کو آگ لگا دی۔ 
اسسٹنٹ ڈائریکٹر فشریز ڈیپارٹمنٹ کے مطابق بروقت کارروائی سے آگ پر قابو پا لیا گیا۔ آگ نے ایک ٹرالر کو مکمل، جبکہ دوسرے ٹرالر کو جزوی طور پر نقصان پہنچایا۔ 
مطلقہ محکمے نے شواہد اکھٹے کر کے نامعلوم افراد کے خلاف کارروائی کا آغاز کر دیا۔

بھارتی باؤلرز نے آئی سی سی ٹی ٹوینٹی ورلڈ کپ میں ساؤتھ افریقہ کے بلے بازوں کو قابو کر لیا۔ 12 رنز میں ساؤتھ افریقہ کی دو اہم وکٹیں گر گئیں۔ 
پہلی وکٹ بمراہ نے، جبکہ دوسری وکٹ ارشدیپ نے اپنے نام کی۔ 
تیز گیند باز بمراہ کی گیند سیدھا وکٹوں پر جا لگی، جبکہ ارشدیپ کی گیند سیدھا وکٹ کیپرکے ہاتھوں میں سما گئی۔ 
بھارت کے خلاف ہینڈرک اور ایڈن مارکم 4،4 رنز بنا کر بالترتیب بمراہ اور ارشدیپ کی گیند کا شکار ہو گئے۔

عوامی مسلم لیگ کے سربراہ شیخ رشید نے اپنے ایک حالیہ انٹرویو میں انکشاف کیا کہ ان کی اپنی زندگی پر لکھی گئی کتاب ’’لال حویلی سے اقوام متحدہ تک‘‘ مارکیٹ میں دو کروڑ میں فروخت ہوئی۔ 
سابق وزیر نے ایک انکشاف یہ بھی کیا کہ ان کو حالیہ ایک کتاب لکھنے کی آفر ہے، جس کی قیمت لگ بھگ 8 کروڑ ہے۔ 
سابق وزیر شیخ رشید نے جی این این کو انٹرویو دیتے ہوئے بتایا کہ ان کی لکھی ہوئی کتابوں میں سے ان کے دل کے سب سے زیادہ قریب کتاب’’ ڈھلتے سائے‘‘ ہے، مگر بد قسمتی سے یہ زیادہ بک نہ سکی۔ 
عوامی مسلم لیگ کے سربراہ شیخ رشید کا شمار پاکستان کے منجھے ہوئے سیاستدانوں میں ہوتا ہے، جنہوں نے اپنی زندگی میں طویل سیاسی جدوجہد کی اور کئی وزارتوں کا قلم دان سنبھالا۔ کویڈ 19 کی وباء کے دوران علالت کے دنوں میں انہوں نے اپنی ایک سوانح عمری ’’لال حویلی سے اقوام متحدہ تک‘‘لکھی، جس میں انہوں نے اپنی پچاس سالہ سیاسی جدوجہد کا تفصیلی احاطہ کیا۔ لوگوں نے شیخ رشید کی لکھی گئی کتاب کو بھر پور پسند کیا۔