قومی اسمبلی کا اجلاس ، حکومتی اور اپوزیشن ارکان کے درمیان جھڑپ

تفصیلات کے مطابق قومی اسمبلی میں شہباز شریف کی تقریر کے دوران بد نظمی پھیلنے کی وجہ سے سپیکر قومی اسمبلی اسد قیصر کی جانب سے اجلاس کو 20 منٹ کے لیے  ملتوی کیا گیا تھا جس دوران حکومتی ارکان علی نواز اعوان اور ن لیگ کے رہنما شیخ رحیل اصغر کے مابین جھڑپ ہوئی اور نازیبا الفاظ کا استعمال بھی کیا گیا جبکہ ایک دوسرے کی جانب کتابوں سے حملے بھی کیے گئے، قریب کھڑے ساتھیوں نے دونوں کے درمیان بیچ بچاؤ کرایا۔

وفاقی وزرا شاہ محمود قریشی اور فواد چودھری بھی نعرہ بازی کرنے والوں میں شریک تھے۔ اس موقع پر ن لیگی ارکان نے اپوزیشن لیڈر کے گرد حصار بنا لیا۔ سپیکر اسد قیصر نے تمام اراکین کو تحمل کا مظاہرہ کرتے ہوئے شور شرابہ نہ کرنے کی سخت تلقین کی لیکن وہ بھی صورتحال کو کنٹرول کرنے میں ناکام رہے، جس کے بعد انھیں اجلاس بیس منٹ کیلئے ملتوی کرنا پڑ گیا۔

شاہد خاقان عباسی کا کہنا تھا کہ شہباز شریف کی تقریر سے حکومتی بنچوں میں آگ لگ گئی ہے۔ انہوں نے بجٹ دستاویزات جھوٹ کا پلندہ قرار دیتے ہوئے کہا کہ اہداف بارہ سے پندرہ فیصد مہنگائی کی بنیاد پر بنائے گئے، وزیر خزانہ بتا دیں کیا بجٹ سے مہنگائی کم ہوگی؟ 

وزیر خارجہ شاہ محمود قریشی کا اپوزیشن اراکین کو وارننگ دیتے ہوئے کہنا تھا کہ بجٹ پر تنقيد حزب اختلاف کا حق ہے لیکن مہذب طريقہ اختیار کیا جائے، اپنی بات کريں اور حکومتی موقف نہ سنيں، يہ مناسب نہيں، اگر اپوزيشن ہماری نہيں سنے گی تو ہم بھی ان کی نہيں سنيں گے۔

SAPM Ali Nawaz Awan , pg 18 pic.twitter.com/xGrV2Pj6tc

— Abdullah Sultan (@abdullahsultan) June 15, 2021