ہم وہ منزل نہیں پا سکے جس مقصد کیلئے پاکستان وجود میں آیا، حافظ نعیم

لاہور: پاکستان کے 77ویں یوم آزادی کے موقع پر جماعت اسلامی کے امیر حافظ نعیم الرحمان نے کہا کہ پاکستان کے حکمرانوں نے نظریہ پاکستان سے انحراف کیا ہے جس کی وجہ سے ملک بڑے چیلنجز کا سامنا ہے۔

ایک بیان میں حافظ نعیم الرحمان نے کہا کہ پاکستان 77 برس کا ہوگیا لیکن ہم وہ منزل نہیں پا سکے جس مقصد کے لیے پاکستان وجود میں آیا۔ ہمارے حکمرانوں کا کوئی ویژن نہیں ہے اور وہ صرف اپنے مفادات کی تکمیل میں مصروف ہیں۔

انہوں نے مزید کہا کہ حکمران لیپ ٹاپ بانٹ کر انفارمیشن ٹیکنالوجی کی ترقی کے نام نہاد دعوے کر رہے ہیں لیکن حقیقت یہ ہے کہ عدل و انصاف کا نظام دین اسلام کے نفاذ میں ہے۔ ہمیں اپنے بچوں کو قیام پاکستان کے لیے دی گئی قربانیاں یاد دلانا ہوگی اور پاکستان کا مطلب کیا لاالہ الااللہ قرار پایا۔

حافظ نعیم الرحمان نے قوم سے اپیل کی کہ وہ پاکستان کو سرسبز و شاداب بنانے کے لیے شجرکاری کو فروغ دیں۔ اس موقع پر انہوں نے خود بھی منصورہ میں ایک پودا لگایا۔