نواز شریف نے آج پھر روایتی انداز میں عوام کو گمراہ کرنے کی کوشش کی، حماد اظہر

پاکستان تحریک انصاف پنجاب کے صدر حماد اظہر نے نواز شریف کی پریس کانفرنس پر در عمل دیتے ہوئے کہا کہ آج پھر انہوں نے اپنے روایتی انداد میں عوام کو گمراہ کرنے کی کوشش کی۔

سوشل میڈیا پلیٹ فارم ایکس پر اپنے ویڈیو پیغام میں حماد اظہر نے کہا کہ آج کی پریس کانفرنس میں نواز شریف نے جو معیشت اور سیاست پر جو نکات اٹھائے، ان کو جواب دینا چاہتا ہوں۔

نوز شریف صاحب نے ابھی ایک گمراہ کن پریس کانفرنس کی۔ اس کا جواب: pic.twitter.com/2XI6K45kZa

— Hammad Azhar (@Hammad_Azhar) August 16, 2024

پی ٹی آئی پنجاب کے صدر نے کہا کہ سب سے پہلے نواز شریف نے کہا کہ میرے دور میں ڈالر 105 روپے تھا تو میاں صاحب اس سے پہلے ڈالر 60 کا بھی تھا، 40 کا بھی تھا اور 20 کا بھی تھا اور آپ نے اپنے دور میں عوام کے 30 ارب ڈالر کے ذریعے مصنوعی طریقے سے ڈالر جو 104 پر رکھا جس کی وجہ سے18-2017 میں ایک شدید معاشی بحران آ گیا، اس معاشی بحران کو عمران خان کی حکومت نے آ کر سنبھالا اور معاشی گروتھ کو 6 فیصد پر لے کر گئے۔

حماد اظہر کا کہنا تھا کہ نواز شریف کا 2013 سے 2018 کا دور وہ واحد دور تھا جس میں ایکسپورٹ نہیں بڑھی جبکہ پوری دنیا میں ایکسپورٹ بڑھ رہی تھی اور پاکستان کی تاریخ میں پہلی بار نواز شریف کے دور حکومت میں ہماری ایکسپورٹ میں کمی آئی۔

پی ٹی آئی رہنما نے مزید کہا کہ میاں صاحب نے بجلی کے بلوں کے حوالے سے بھی کہا کہ تو ان کو یاد دلاتا چلوں کہ عمران خان کے دور حکومت میں فی یونٹ بجلی کا ریٹ 16 روپے 50 پیسے تھا اور اب جو فی یونٹ 60 سے 70 روپے پر چلا گیا ہے تو یہ اضافہ بھی پچھلے دو سالوں میں آپ کے دور حکومت میں ہوا ہے اور اس کی بنیادی وجہ 2013 سے 2018 میں آپ کا دور حکومت میں آئی پی پیز کے ساتھ کئے گئے وہ مہنگے ترین سودے تھے جو بند کمروں میں کئے گئے۔

ان کا مزید کہنا تھا کہ میاں صاحب آپ نے ڈیل کرکے اپنے بھائی اور بیٹی کےلئے حکومت لی ہے، فسطائیت کرکے اور مینڈیٹ چوری کرکے، آپ نے اپنے اقتدار کے لئے عوام کو اس صورتحال سے دوچار کیا۔ آپ کو یاد دلاتا چلو کہ آپ اور آپ کی بیٹی تو اپنی سیٹ ہار چکے تھے۔