کشیدگی میں اضافہ، لبنان میں اسرائیلی حملوں سے  5 ہلاک ،20 زخمی

بیروت : اسرائیلی جنگی طیاروں نے گزشتہ رات لبنان میں ایک بار پھر فضائی حملے کر کے دہشت پھیلا دی ہے۔ ان حملوں میں کم از کم 5 افراد ہلاک اور 20 زخمی ہو گئے ہیں۔

لبنان کی وزارت صحت کے مطابق اسرائیلی حملے مشرقی لبنان کے علاقے بیکا میں کیے گئے ہیں جہاں ایک شخص ہلاک اور 20 زخمی ہوئے ہیں۔ زخمیوں میں آٹھ بچے اور ایک حاملہ خاتون بھی شامل ہیں۔

غیر ملکی میڈیارپورٹ کےمطابق حزب اللہ کے ذرائع کا کہنا ہے کہ اسرائیلی طیاروں نے بالبیک شہر کے قریب متعدد حملے کیے ہیں۔

یہ حملے اسرائیل کی جانب سے مشرقی لبنان کے اندر اسی طرح کے حملوں کے 24 گھنٹے بعد کیے گئے ہیں جس میں اسرائیل کی جانب سے حزب اللہ کے ایک اعلی کمانڈر کی ہلاکت کے بعد کشیدگی میں اضافہ ہوا ہے۔

مقامی ہسپتال کے ذرائع کے مطابق، زخمی ہونے والوں میں ایک ہی خاندان کے پانچ بچے بھی شامل ہیں۔

اسرائیلی حملوں کے بعد لبنان میں کشیدگی میں مزید اضافہ ہو گیا ہے۔ حزب اللہ نے ابھی تک اس واقعے پر کوئی ردعمل نہیں دیا ہے۔