پاکستان کے سابق نگران وزیراعظم جسٹس(ر)حاجی ہزارخان کھوسو انتقال کرگئے

تفصیلات کے مطابق سابق نگران وزیراعظم جسٹس(ر)حاجی ہزارخان کھوسو چنددنوں سےعلیل تھے، ان کے اہل  خانہ نے انتقال کی تصدیق کردی ۔ سابق نگران وزیراعظم کی  نمازجنازہ  ان کےآبائی گاؤں کٹبار شریف  میں آج دوپہر 12بجے  اداکی جائےگی۔

میر ہزار خان کھوسو کو  ملکی تاریخ کے چھٹے نگران اور مجموعی طور پر 26ویں وزیراعظم کے منصب پر فائز ہونے کا اعزاز  حاصل ہے ۔ میر ہزار خان کھوسو 24 مارچ2013  کو پاکستان کے   نگران وزیر اعظم منتخب ہوئے ۔

  جسٹس ریٹائرڈ میر ہزار خان کھوسو 3 ستمبر 1929 کو بلوچستان کے ضلع جعفرآباد کے گاؤں اعظم خان کھوسو  میں پیدا ہوئے۔1954 میں سندھ یونیورسٹی سے گریجویشن اور دو برس بعد کراچی یونیورسٹی سے قانون کی سند حاصل کی۔ ذوالفقار علی بھٹو کی حکومت کے آخری ایام میں یعنی 20 جون 1977 میں بلوچستان ہائی کورٹ کے عارضی جج بنے۔

انہیں ضیاءالحق نے مستقل جج بنایا اور بطور چیف جسٹس انہوں نے 29 ستمبر 1991کو ریٹائر کیا۔ریٹائرمنٹ کے ایک ماہ سے بھی کم عرصے میں وفاقی شرعی عدالت کے جج بن گئے اور میاں نواز شریف کے دور میں 17 نومبر 1992 کو وفاقی شرعی عدالت کے چیف جسٹس بنے۔ 2008ء کے انتخابات کے نتیجے میں یوسف رضا گیلانی کو وزیراعظم بنایا گیا۔ سپریم کورٹ کی جانب سے نااہلی پر راجا پرویزاشرف اس منصب پر حکومت کی تکمیل تک برقرار رہے جس کے بعد میر ہزار خان کھوسو کو نگران وزیراعظم منتخب کیا گیا ۔