میچ فکسنگ الزامات:لنکا ٹی10 لیگ فرنچائز کا بھارتی مالک  گرفتار

سری لنکن ٹی 10 لیگ کی ٹیم گال مارولز کے مالک پریم ٹھاکر کو میچ فکسنگ کے الزامات میں گرفتار کرلیا گیا۔

کرکٹ ویب سائٹ کے مطابق لنکا ٹی 10 لیگ کی ٹیم گال مارولز کے مالک پریم ٹھاکر کو میچ فکسنگ کے الزامات پر گرفتار کیا گیا، پریم ٹھاکر کو سری لنکن اسپورٹس پولیس یونٹ نےکینڈی سے حراست میں لیا۔

غیر ملکی میڈیا کے مطابق فرنچائز مالک  پریم ٹھاکر کو گزشتہ روز گرفتار کرکے آج کولمبو مجسٹریٹ کی عدالت میں پیش کیا گیا، عدالت نے پریم کا 16 دسمبر تک ریمانڈ دے دیا ہے۔

واضح رہے کہ لنکا ٹی 10 لیگ سری لنکا کے شہر کینڈی میں کھیلی جا رہی  ہے، جہاں غیر ملکی کھلاڑی کو پریم ٹھاکر کی جانب سے میچ  فکسنگ کےلیے رابطہ کیا گیا۔

تاہم دوسری جانب سری لنکا کرکٹ  بورڈ کی جانب سے اس معاملے پر تاحال کوئی بیان جاری نہیں کیا گیا۔

ٹورنامنٹ کے ڈائریکٹر سمانتھا ڈوڈنویلا کا کہنا ہے کہ ٹورنامنٹ شیڈول کے مطابق جاری رہے گا۔