وزیر اعظم سے تاجکستان کے وزیر توانائی کی ملاقات،دو طرفہ تعلقات پر تبادلہ خیال

وزیر اعظم شہباز شریف سے تاجکستان کے وزیر برائے توانائی دلیر جمعہ نے ملاقات کی، ملاقات میں دونوں رہنماؤں نے دو طرفہ تعلقات اور فروغ اور باہمی تعاون پر تبادلہ خیال کیا گیا۔

وزیر اعظم محمد شہباز شریف نے پاکستان تاجکستان جوائنٹ کمیشن کے دوران مختلف شعبوں میں تعاون میں ہونے والی پیشرفت پر اطمینان کا اظہار کیا، وزیراعظم نے تاجک صدر کے لئے نیک خواہشات کا اظہار کیا،وزیر اعظم  نے کہا کہ امید ہے تاجکستان کے صدر جلد پاکستان کا دورہ کریں گے.

 اس موقع پر وزیراعظم نے اپنے دورے میں مفاہمتی یادداشتوں، معاہدوں پر اطمینان کا اظہار کیا اور کہا کہ معاہدوں پر بروقت عمل درآمد سے دوطرفہ تعلقات کو مزید مضبوط بنانے میں مدد ملے گی۔

تاجکستان کے وزیر برائے توانائی نے پاکستان آمد پر شانداr استقبال اور مہمان نوازی پر وزیراعظم کا شکریہ ادا کیا، اس موقع پروزیرتوانائی  نے کہا کہ دونوں ممالک کے درمیان روابط مزید بہتر بنانے اور تعاون بڑھانے کی ضرورت ہے۔

ملاقات میں کاسا-1000 سمیت علاقائی روابط کے دیگر منصوبے بھی زیر بحث آئے، فریقین نے مواصلات خصوصاً زمینی روابط، توانائی، تعلیم، زراعت کے شعبوں میں تعاون کو مزید فروغ دینے پر بھی اتفاق کیا۔