حکومتی اتحاد اور پی ٹی آئی سے مذاکرات کے لیے اسپیکر قومی اسمبلی نے دونوں کمیٹیوں کے ارکان کو ملاقات کی دعوت دے دی

قومی اسمبلی کے اسپیکر سردار ایاز صادق نے حکومت اور پاکستان تحریک انصاف کے درمیان مذاکرات کے لیے دونوں طرف سے بننے والی کمیٹیوں کے ارکان کو  ملاقات کی دعوت دے دی۔

سردار ایاز صادق نے حکومت اور پی ٹی آئی کی مذاکراتی ٹیموں کو کل پیر کو دن ساڑھے 11 بجے ملاقات کی دعوت دیتے ہوئے کہا ہے کہ مسائل کو مذاکرات سے حل کرنے کے حوالے سے وزیراعظم کا اقدام خوش آئند ہے، نیک نیتی سے حکومت اور اپوزیشن کو مذاکرات کی دعوت دی۔

سردار ایاز صادق نے کہا کہ سپیکر آفس کے دروازے اراکین کے لیے ہمیشہ کھلے ہیں، بات چیت اور مکالمے سے ہی آگے بڑھا جاسکتا ہے، دونوں کمیٹیوں کے اراکین سے پارلیمنٹ ہاؤس میں اپنے چیمبر میں ملاقات کروں گا۔ 

واضح رہے کہ وزیراعظم نے سپیکر قومی اسمبلی ایاز صادق کی تجویز پر پی ٹی آئی سے مذاکرات کیلئے حکومتی کمیٹی تشکیل دی ہے۔

حکومتی اتحاد کی کمیٹی میں نائب وزیراعظم اسحاق ڈار، رانا ثنا اللہ، سینیٹر عرفان صدیقی شامل ہیں، راجہ پرویز اشرف، سید نوید قمر، خالد مقبول صدیقی، عبدالعلیم خان اور چودھری سالک حسین بھی کمیٹی کے رکن ہیں۔