اسٹوڈنٹس یونین بحالی کیس،آئینی بینچ نے وفاق اور متعلقہ فریقین کو نوٹس جاری کر دیے

اسلام آباد:اسٹوڈنٹس یونین بحالی کیس میں سپریم کورٹ کے آئینی بینچ نے وفاق و متعلقہ فریقین کو نوٹس جاری کر دیے ہیں۔
سپریم کورٹ کے آئینی بینچ میں اسٹوڈنٹس یونین بحالی کیس کی سماعت کی۔
کیس کی سماعت جسٹس امین الدین خان کی سربراہی میں 6 رکنی بینچ نے کیس کی،جس میں آئینی بینچ نے اسٹوڈنٹس یونین بحالی کے معاملے پر وفاق و متعلقہ فریقین کو نوٹس جاری کر دیا۔
دوران سماعت جسٹس جمال مندوخیل نے ریمارکس دیتے ہوئے کہا کہ قائد اعظم یونیورسٹی میں اسٹوڈنٹس یونین الیکشن کا شیڈول جاری ہوا ہے، یہاں کے الیکشن کو پائیلٹ پروجیکٹ کے طور پر دیکھا جائے، اپنے ریمارکس میں جسٹس جمال مندوخیل نے کہا کہ بار کے الیکشن میں سیاست آ گئی ہے جبکہ سیاسی جماعتوں نے تعلیمی اداروں میں اپنے سیاسی ونگز بنالیے ہیں۔
سماعت کے دورا ن جسٹس محمد علی مظہر نے استفسار کیا کہ کیا اسٹوڈنٹس یونین پر پابندی ہے؟۔ اور یہ پابندی کب لگائی گئی؟
انہوں نے کہا کہ کراچی یونیورسٹی میں سیاسی جماعتوں کے پولیٹیکل ونگز ہیں، اسٹوڈنٹس یونین کا مطلب سیاست نہیں اسٹوڈنٹس کی فلاح و بہبود ہے۔
جس پر جسٹس حسن اظہر رضوی نے ریمارکس دیتے ہوئے کہا کہ کراچی یونیورسٹی میں اسٹوڈنٹس یونینز کہ وجہ سے تشدد آیا۔ اور تشدد کی وجہ سے کراچی یونیورسٹی میں 35 سال سے رینجرز تعینات ہیں۔
جواب میں وکیل عمر گیلانی نےموقف اختیار کرتے ہوئے کہا کہ کراچی یونیورسٹی میں خاص حالات کی وجہ سے رینجرز تعینات کی گئی تھی، جس کے ردعمل میں جسٹس حسن رضوی نے استفسار کیا کہ ایسے کیا خاص حالات تھے؟، انہوں نے مزیدکہا کہ پنجاب یونیورسٹی میں سابق وزیر اعظم کو اغواء کیا گیا جنہیں بعد ازاں اسٹوڈنٹس سے چھڑایا گیا۔
 آئینی بینچ کے سربراہ جسٹس امین الدین خان نے کہا کہ اسٹوڈنٹس یونین ایک نرسری ہے، انہی لوگوں نے بعد میں ملک کی بھاگ دوڑ سنبھالنا ہوتی ہے۔
جسٹس حسن رضوی نے کہا کہ اچھے طلبا کیساتھ بیٹھ کر مسئلہ حل کریں، بھتہ خور کو مسئلہ کے حل کیلئے ساتھ نہ بٹھائیں۔
دوران سماعت جسٹس مسرت ہلالی نے ریمارکس دئیے کہ بچوں کو پڑھنے دیں انہیں سیاست میں کیوں ڈال رہے ہیں، ہمارے ملک میں سیاست جارحانہ ہے۔