کراچی: نامعلوم افراد کی گھر میں گھس کر فائرنگ،2 بھائی جاں بحق، 3 بھائی زخمی

کراچی :شہر قائد کے علاقے سائٹ ایریا ہارون آباد میں نامعلوم افراد نے گھر میں گھس کر فائرنگ کر دی جس کے نتیجے میں دو سگے بھائی جاں بحق اور 3 بھائی زخمی ہو گئے۔
پولیس ذرائع کے مطابق سائٹ ایریا ہارون آباد میں کراچی واٹر اینڈ سیوریج کارپوریشن کی رہائشی کالونی میں نامعلوم افراد کی فائرنگ سے 5 بھائی زخمی ہو گئے جن میں سے 2 جاں بحق ہو گئے جبکہ 3 بھائی جناح اسپتال میں زیر علاج ہیں۔
پولیس کی ابتدائی رپورٹ کے مطابق مطابق جاں بحق ہونے والوں کی شناخت سمیع اللہ اور اسد اللہ کے نام سے ہوئی ہے، جبکہ زخمیوں میں اکرام اللہ، شفیع اللہ، اور امیر عبداللہ شامل ہیں۔
 اسپتال انتظامیہ کا کہنا ہے کہ زخمیوں میں سے ایک کی حالت تشویشناک ہے۔
فائرنگ سے زخمی شفیع اللہ کی جانب سےپولیس کودئیے گئے بیان کے مطابق، چار سے پانچ مسلح افراد گھر میں گھس آئے اور ان کے بھائیوں کو نشانہ بنایا۔ انہوں نے مزید کہا کہ ملزمان نے گھر سے کوئی چیز نہیں لوٹی۔شفیع اللہ نے بتایا کہ ان کا آبائی تعلق گمبٹ سے ہے اور ان کی کسی سے کوئی دشمنی نہیں تھی، ہم پانچوں بھائی سرکاری ملازم ہیں۔
پولیس کی جانب سے کی جانےوالی ابتدائی تحقیقات کے مطابق گزشتہ روز جاں بحق اور زخمی افراد کے بچوں کا محلے میں کچھ لڑکوں سے جھگڑا ہوا تھا، جھگڑے کے بعد لوگوں نے صلح کرادی تھی۔
پولیس کا کہنا ہے اہلخانہ کو شبہ ہے کہ فائرنگ کرنے والے لڑکے وہی ہیں جن سے کل جھگڑا ہوا تھا، زخمی افراد سے واقعے سے متعلق تفصیلات لی جارہی ہیں۔