حکومتی اقدامات کی بدولت معیشت میں استحکام آیا ہے، نائب وزیر اعظم

پاکستان بزنس کونسل کی تقریب سے خطاب کرتے ہوئے نائب وزیراعظم اسحاق ڈار نے کہا کہ ملکی معیشت مثبت سمت پر گامزن ہے اور حکومتی اقدامات کی بدولت معیشت میں استحکام آیا ہے۔

اسحاق ڈار نے  کہا کہ ان کی حکومت کی بدولت پاکستان دنیا کی 24ویں بڑی معیشت بن چکا ہے اور 2022 میں اقتدار میں آکر ملک کو دیوالیہ ہونے سے بچایا۔

انہوں نے 2013 کے دوران ملک میں طویل لوڈشیڈنگ اور دہشت گردی کے مسائل کا ذکر کرتے ہوئے کہا کہ ہماری حکومت نے ان دونوں مسائل کا خاتمہ کیا اور پاکستان کو ترقی کی راہ پر گامزن کیا۔

نائب وزیراعظم نے کہا کہ حکومت اور نجی شعبے کو مل کر ملک کی ترقی کے لیے کام کرنا ہوگا اور پاکستان کی ترقی کے لیے پائیدار ترقیاتی اہداف کے حصول میں پرعزم ہیں۔

انہوں نے کہا کہ پاکستان میں معدنیات کا بڑا خزانہ موجود ہے اور ہماری حکومت نے مختلف شعبوں میں ترقی کی راہ ہموار کی ہے، جن میں زراعت، معدنیات اور آئی ٹی کے شعبے شامل ہیں۔