دہشت گردوں کے حمایتیوں سے کسی قسم کی رعایت نہیں ہوگی، رانا ثناء اللہ

وزیراعظم کے مشیر برائے سیاسی امور رانا ثناء اللہ نے کہا ہے کہ دہشت گردوں کے حق میں بات کرنے والے حمایتیوں سے رعایت نہیں ہوگی، دہشت گردوں کے خلاف کارروائیاں ان کے مکمل خاتمے تک جاری رہیں گی۔

انہوں نے کہا کہ ،دہشت گردی کسی صورت برداشت نہیں، دہشت گردوں کا قلع قمع کریں گے۔ دہشت گردوں کے کوئی مطالبات نہیں ہیں، دہشت گرد پاکستان کو توڑنا اور بلوچستان کو آزاد کروانا چاہتے ہیں۔

رانا ثناء اللہ نے کہا کہ آج کے دن ہماری عقیدت کے سب سے زیادہ حقدار دہشت گردی کے خلاف جانوں کی قربانی دینے والے شہید ہیں، ان کے خاندان بھی قوم کے محسن ہیں۔

ان کا کہنا تھا کہ شہداء کے خاندان کے پیاروں کی قربانی کی وجہ سے آج قوم عید کی خوشیاں منا رہی ہے۔ انہوں نے کہاکہ دہشت گردوں کے خلاف کارروائی جاری ہے اور خاتمے تک جاری رہے گی۔

ان کا کہنا تھا درخواست ہے ایسا مطالبہ نہ کریں جس سے دہشت گردوں کی حمایت کا تاثر قائم ہو، ماہ رنگ بلوچ اور پی ٹی ایم کے لوگوں کو دہشت گرد نہیں کہتے، انہیں چاہیے ٹرین یرغمال بنانے اور بے گناہ لوگوں کو شہید کرنے والوں کی مذمت کریں۔

وزیراعظم کے مشیر نے کہا کہ وزیراعلیٰ پنجاب عام آدمی کی زندگی میں آسانیاں لا رہی ہیں، عام آدمی کے لئے مزید آسانیاں لا ئی جائیں گی، ان کا کہنا تھا کہ پاکستان مسلم لیگ (ن) نے ہمیشہ خدمت کی سیاست کی ہے۔