پی ایس ڈی پی پر مشاورت کے بغیر بجٹ کیلئے ووٹ نہیں دیں گے، بلاول بھٹو

گڑھی خدا بخش:چیئرمین پاکستان پیپلزپارٹی بلاول بھٹو نے کہا کہ اگرپی ایس ڈی پی پر مشاورت نہ ہوئی توبجٹ میں ووٹ نہیں دیں گے۔
قائد عوام شہید ذوالقفار بھٹو کی 46 ویں برسی کے موقع پرگڑھی خدا بخش میں جلسے سے خطاب کرتے ہوئے بلاول بھٹو نے کہا کہ ہم سب ذوالفقار علی بھٹو کے علم بردار ہیں اور بھٹو کو خراج عقیدت پیش کرنے کے لیے یہاں جمع ہوئے ہیں۔
بلاول بھٹونے کہا کہ صدر زرداری نے گڑھی خدا بخش کے ساتھ اپنا فرض نبھایا اور صدارتی ریفرنس کے ذریعے شہید بھٹو کو انصاف دلایا عوام کی عدالت نے بھٹو کو بے گناہ قرار دیا اور پچاس سالہ جدوجہد کے بعد بھٹو کو انصاف ملا۔
چئیرمین پی پی نے کہا کہ دہشت گرد کبھی مذہب، کبھی قوم پرستی اور کبھی علیحدگی کے پیچھے چھپتے ہیں، ہم دہشت گردوں کا سیاسی ،بین الاقوامی سطح پر مقابلہ کریں گے، یہ پاکستان کےخلاف جنگ چھیڑ چکے ہیں، دہشت گردی کے ون پوائنٹ ایجنڈے پر سب کومتحد ہونا ہوگا، دہشت گردی کےخلاف ہم وزیراعظم کا ساتھ دیں گے۔
بلاول بھٹو زرداری نے کہا ہم نے ان درندوں کامقابلہ کرنا ہے جو عوام کے ساتھ خون کی ہولی کھیل رہے ہیں، عالمی سازش کامیاب کرنے کیلئے پاکستان کے عوام کو شہید کیا جا رہا ہے، کے پی میں رمضان میں مسجد میں خودکش دھماکوں سے لوگ شہید کئے جاتے ہیں، بلوچستان میں غریب مزدوروں کو فائرنگ کر کے شہید کیا جاتا ہے، ہمارے قائدین کو لیاقت باغ کی سڑکوں پر خودکش حملوں میں شہید کیا جاتا ہے۔
چیئرمین پیپلزپارٹی نے کہا کہ قیدی نمبر 804 کو سیاست کرنے اور اپوزیشن میں رہنے کا حق ہے مگر وہ دہشت گردی کے خلاف اپنا حق ادا کرے، ہم پاکستان کھپے کہنے والے لوگ ہیں، میں ہمیشہ وفاق کے ساتھ کھڑا رہوں گا اور ہر سازش کو ناکام بناؤں گا۔
بلاول بھٹو نے کہا کہ صدر آصف زرداری نے 18ویں ترمیم کی صورت میں شہید ذوالفقار علی بھٹو کا آئین بحال کیا صوبوں کو حق دلا کر قائد عوام کا حق پورا کیا، شہید بھٹو کو نشان پاکستان ایوارڈ سے نوازا گیا کیوں کہ بھٹو نے عوام کے لیے جہدوجہد کی، محنت کشوں کو حقوق دیے۔
تقریب سے خطاب کرتے ہوئے انہوں نے مزیدکہا کہ ہم چاہتے ہیں سب کی ترقی ہو، ہم توپاکستان کھپے کہنے والے ہیں’نا کھپے والے نہیں ہیں، جوملک توڑنا چاہتے ہیں ان کو ’پاکستان کھپے‘ سےجواب دیں گے، تمام قوتیں سیاسی ہویا غیرسیاسی ہوجو پاکستان کونقصان پہنچانا چاہتے ہیں ان کوخبردارکرتا ہوں ہم ان کا راستہ روکیں گے۔
چیئرمین بلاول بھٹونے کہا کہ ہمیں سندھ دریا کو بچانا ہے میں وزیر خارجہ رہا ہوں اور پانی کی تقسیم کی جنگ عالمی سطح پر لڑ کر آیا ہوں، دنیا کو بتایا ہے کہ ہمارے دریائے سندھ کو بچانا ہے، ہم عالمی دنیا میں پانی کا مسئلہ اٹھاتے رہے ہیں بھارت کو پانی روک رہا ہے میں اس کا عالمی سطح پر مقابلہ کرکے آیا ہوں بھارت ہمارے پانی پر ڈاکے مارتا آرہا ہے۔
انہوں نے مزید کہاکہ عدالتی اصلاحات، آئینی عدالت ہوگی تو برابری کی بنیاد پر نمائندگی ملے گی، ملک میں سیاست اس نہج پر پہنچ چکی ہے کہ نقصان ہورہا ہے پیپلز پارٹی نے ہمیشہ دہشت گردی کے خلاف آواز اٹھائی ہے۔
انہوں نے کہا کہ چاروں صوبوں کی پی ایس ڈی پی ملکربنانے کا وعدہ کیا گیا تھا، حکومت کےساتھ بیٹھ کرپی ایس ڈی پی فائنل کریں گےاوربجٹ بنائیں گے، پی ایس ڈی پی میں مشاورت نہ ہوئی توبجٹ میں ووٹ نہیں دیں گے۔