ٹرمپ انتظامیہ کا ایک اور وار،پاکستانی طلباء کے لیے اہم تبادلہ پروگرام بند

لاہور:ٹرمپ انتظامیہ نے ایک اور وار کرتے ہوئے پاکستانی طلباء کے لیے اہم تبادلہ پروگرام بند کر دیا
تفصیلات کے مطابق انتظامیہ نےامریکا کی جانب سے پاکستانی طلباء کے لیے گلوبل انڈر گریجویٹ نامی اہم تبادلہ پروگرام بند کر دیا گیا۔
اس حوالے سے امریکی محکمہ خارجہ کی جانب سے بتایا گیا ہے کہ پاکستان کے لیے گلوبل انڈرگریجویٹ ایکسچینج پروگرام (Global UGRAD) کا اختتام کر دیا گیا ہے۔ 
یونائیٹڈ اسٹیٹس ایجوکیشنل فاؤنڈیشن ان پاکستان کے مطابق، یہ پروگرام گزشتہ 15 سالوں سے کامیابی کے ساتھ جاری تھا لیکن اب مزید پیش نہیں کیا جائے گا۔
یو ایس ای ایف پی نے اپنے اعلامیے میں کہا کہ وہ جانتے ہیں کہ یہ خبر خاص طور پر ان طلباء کے لیے مایوس کن ہو سکتی ہے جنہوں نے اس سال درخواست دی تھی اور اس موقع کا انتظار کر رہے تھے۔
فاؤنڈیشن نے طلباء کے جذبے اور تعلیمی بہتری کے عزم کو سراہتے ہوئے کہا کہ اگرچہ یہ باب بند ہو رہا ہے، مگر طلباء دیگر تبادلہ پروگراموں اور وظائف کی تلاش جاری رکھیں جو ان کے خوابوں سے ہم آہنگ ہو سکتے ہیں۔

فاؤنڈیشن کی جانب سے اعلامیے کے اختتام پر طلباء کے لیے نیک تمناؤں کا اظہار بھی کیا گیا۔
یو ایس ای ایف پی نے پروگرام کے اختتام کا اعلان اپنی ویب سائٹ اور سوشل میڈیا پلیٹ فارمز پر کیا۔
 خیال رہےکہ پچھلے پندرہ سالوں سے جاری رہنے والے گلوبل یوگرڈ پروگرام نے ہزاروں طلباء کو نہ صرف تعلیمی ترقی بلکہ ثقافتی تبادلے اور قائدانہ صلاحیتوں کو فروغ دینے میں مدد دی۔
اس پروگرام کے تحت ہر سال سینکڑوں پاکستانی تعلیم حاصل کرنےکے لیے امریکہ جاتے تھے۔