ریڈیو پاکستان حملہ کیس: اے ٹی سی عدالت کا ارباب وسیم سمیت 5 ملزمان کو گرفتار کرنے کا حکم

پشاور: انسداد دہشتگردی عدالت(اے ٹی سی) پشاور نے  9 مئی کو ریڈیو پاکستان کی عمارت پر حملےکے کیس میں پاکستان تحریک انصاف پارلیمنٹیریئنز کے ایم پی اے ارباب وسیم کو گرفتار کرنے کا حکم دے دیا۔ 
 انسداد دہشتگردی عدالت  کے جج ولی محمد خان نےر یڈیو پاکستان کی عمارت پر حملےکے کیس کی سماعت کی۔
دوران سماعت عدالت نے پاکستان تحریک انصاف پارلیمنٹرین کے ایم پی اے ارباب وسیم سمیت پانچ ملزمان کے ناقابل ضمانت وارنٹ گرفتاری اور متعلقہ پولیس افسران کو عدالتی حکم کے تعمیل کا حکم دیا۔
پراسیکوشن نے اپنے دلائل میں کہا کہ ملزمان نے 9 مئی کو احتجاج کے دوران ریڈیو پاکستان بلڈنگ پر حملہ کیا، ملزمان نے بلڈنگ کو آگ لگائی اور عمارت کو نذر آتش کیا، تھانہ شرقی پولیس نے ارباب وسیم سمیت کئی ملزمان کو مقدمے میں نامزد کیا ، ملزمان کے خلاف تحقیقات مکمل ہونے کے بعد ٹرائل شروع کیا گیا۔
اپنے دلائل میں پراسیکوشن نے بتایا کہ ٹرائل کے دوران مقدمے نامزد ارباب وسیم اور دیگر چار ملزمان مسلسل پیش نہیں ہورہے ہیں ، ایم پی اے ارباب وسیم اور دیگر چار ملزمان کو کئی بار پیش ہونے کے لیے نوٹسز جاری کیے گئے ۔
عدالت نے دلائل سننے کے بعد پیش نہ ہونے پر ملزمان کی ناقابل ضمانت وارنٹ گرفتاری جاری کردی، متعلقہ پولیس افسران ملزمان کو گرفتار کرکے ائندہ سماعت پر پیش کریں، عدالت نے مقدمے کی مزید سماعت پانچ مئی تک ملتوی کردی گئی۔