گزشتہ رات بھارت نے جارحیت کرکے فاش غلطی کی جس کا خمیازہ اس کو بھگتنا ہو گا،وزیر اعظم

اسلام آباد:وزیراعظم شہباز شریف کا قوم سے خطاب کرتے ہوئے کہنا تھا کہ گزشتہ رات بھارت نے جارحیت کرکے جو فاش غلطی کی، اس کا خمیازہ اب اسے ضرور بھگتنا ہوگا۔
قوم سے خطا ب کرتے ہوئے وزیر اعظم شہباز شریف نے کہا کہ بھارت سمجھ رہا تھا کہ ہم خاموش بیٹھ جائیں گے، بھارت کے5 جنگی طیارے جو ان کا غرور تھے پاکستان نے ان کو خاک میں ملا دیا۔
انہوں نے کہا کہ شاید وہ سمجھ بیٹھے تھے کہ ہم پیچھے ہٹ جائیں گے لیکن وہ یہ بات بھول گئے کہ یہ بہادروں کی قوم ہے، جو اپنے عزم میں فولادی ہے، جس کے سپوتوں نے خود کو میدان جنگ سے نکھارا ہے، جو اپنے وطن کی عزت اور حفاظت کے لیے خون کے آخری قطرے تک لڑنے کے لیے تیار ہے،انہوںنے مزید کہا کہ عہد کرتے ہیں بھارت سے شہیدوں کے خون کے ایک ایک قطرے کا حساب لیں گے۔
وزیر اعظم شہباز نے کہا کہ پاکستان نے گزشتہ رات اپنے سے کئی گنا بڑے دشمن کو گٹھنے ٹیکنےپر مجبور کیا، پاکستان نے راویتی ہتھیاروں کی جنگ میں بھی برتری ثابت کر دی،ان کا کہنا تھا کہ کل رات ہمارے شاہینوں نے فضاؤں میں طوفان برپا کر دیا تھا،ہمارے شاہینوں نے دشمن پر ایسی کاری ضر ب لگائی ہے جو وہ کبھی نہیںبھول سکے گا۔
قوم سے خطاب میں شہباز شریف نے مزید کہا کہ پاکستا ن دہشتگردی سے سب سے زیادہ متاثر ہونے والا ملک ہے،دہشتگردی کے خلاف پاکستان نے 90 ہزار سے زائد شہریوں کی جانیں گنوائی ہیں،ہم دہشت گردی کے خلاف جنگ کو منطقی انجام تک پہنچا کر ہی دم لیں گے۔
ان کا کہنا تھا کہ ابھی ایک بچے کی نماز جنازہ پڑھ کر آئے ہیں، اس کی عمر صرف 7 سال تھی، اپنی والدہ اور بھائی کے ساتھ گھر پر تھا کہ اسپرنٹر لگا اور وہ اللہ تعالیٰ کو پیارہ ہو گیا، دل پر ہاتھ رکھ کر بتائیں کہ ننھا منہ پھول کھیلنے سے پہلے مرجھا گیا۔
وزیراعظم نے کہا کہ شہادت کے بلند رتبے پر ایسے ہی فائز ہونے والے ہمارے دوسرے عظیم پاکستانیوں کو قوم خراج عقیدت پیش کرتی ہے، اور پورا پاکستان ان شہدا کے خاندانوں کے ساتھ ہے اور زخمیوں کی صحت یابی کے لیے دعا گو ہے۔
پاک فضائیہ کی تعریف کرتے ہوئے وزیراعظم نے کہا کہ یہ ہمارا دندان شکن جواب تھا جس میں اسکوارڈن لیڈر ایم ایم عالم کی گرج تھی، جو کل رات دوبارہ پورے زور سے گونجی اور ہمارے شاہینوں نے دشمن پر ایسی کاری ضربیں لگائیں، جو وقت کا مرہم بھی کبھی نہیں بھر سکے گا۔
شہباز شریف نے کہا کہ بھارت کے بزدلانہ حملوں نے 26 معصوم شہری شہید اور 46 زخمی ہوئے، ان میں بچے اور خواتین شامل ہیں۔
واضح رہے کہ بھارت نے گزشتہ رات، اندھیرے میں پاکستان کے شہری علاقوں پر حملہ کرکے طبل جنگ بجادیا تھا۔
بھارتی حملے کے بعد پاکستان کی مسلح افواج نے بزدلانہ حملے کا منہ توڑ جواب دیتے ہوئے بھارتی فضائیہ کے 3 رافیل طیاروں سمیت 5 جنگی طیارے گرائے اور ایک بریگیڈ ہیڈکوارٹر سمیت متعدد فوجی چیک پوسٹوں کو تباہ کردیا تھا۔