پاکستان کا عالمی برادری سے بھارتی جوہری تنصیبات اور مواد کی سیکیورٹی کا جائزہ لینے کا مطالبہ

اسلام آباد: پاکستان نے عالمی برادری سے بھارتی جوہری تنصبیات اور مواد کی سکیورٹی کا جائزہ لینے کا مطالبہ کردیا۔
ترجمان دفتر خارجہ شفقت علی خان نے بھارتی وزیر دفاع کے پاکستانی ایٹمی اثاثوں سے متعلق بیان کی شدید مذمت کرتے ہوئے کہا یہ غیر ذمہ دارانہ بیان بھارتی عدم تحفظ اور ناکام دفاعی حکمت عملی کی عکاسی کرتا ہے۔
اپنے بیان میں ترجمان نے کہا کہ پاکستان کی روایتی دفاعی صلاحیت بھارت کی جارحیت کو روکنے کے لیے کافی ہے۔
ترجمان دفتر خارجہ نےمزید  کہا کہ بھارت کے شہر دہرہ دون میں 5 افراد کے قبضے سے ایٹمی مواد برآمد ہوا اور گزشتہ برس بھارت میں 100 ملین ڈالر مالیت کا تابکاری مواد ’کالیفورنیم‘ برآمد ہوا جب کہ 2021 میں بھی بھارت میں تابکار مواد کی چوری کے تین واقعات رپورٹ ہوئے، تابکار مواد کی چوری کے واقعات بھارت میں ایٹمی مواد کے کالے بازار کی نشاندہی کرتے ہیں۔
انہوں نے سوال اٹھایا کہ نئی دہلی نے تابکار مواد اور ایٹمی تنصیبات کی حفاظت کے لیے کیا اقدامات کیے ہیں؟ اور یہ بھی کہا کہ یہ واقعات اس بات کی نشاندہی کرتے ہیں کہ بھارت میں حساس، دہرے استعمال والے مواد کی ایک بلیک مارکیٹ موجود ہے۔
انہوں نے زور دیا کہ پاکستان ان واقعات کی مکمل تحقیقات کا مطالبہ کرتا ہے اور بھارت پر زور دیتا ہے کہ وہ اپنے ایٹمی اثاثوں اور تنصیبات کی سلامتی یقینی بنائے۔
پاکستان نے مطالبہ کیا کہ بھارت میں ایٹمی تنصیبات اور مواد کی سکیورٹی کا جائزہ لیا جائے۔
خیال رہے کہ اس سے قبل بھارتی وزیر دفاع راجناتھ سنگھ نے آج ایک بیان میں کہا تھا کہ پاکستان کے ایٹمی ہتھیاروں کو اقوام متحدہ کے جوہری نگران ادارے کے تحت ہونا چاہیے۔ انہوں نے سوال کیا کیا ایٹمی ہتھیار ایک غیر ذمہ دار اور باغی ملک کے ہاتھوں میں محفوظ ہیں؟ اور کہا کہ پاکستان کے جوہری ہتھیاروں کو آئی اے ای اے کی نگرانی میں لایا جانا چاہیے۔