9 مئی مقدمات: بانی پی ٹی آئی کے پولی گرافک ٹیسٹ کیلئے پولیس ٹیم اڈیالہ جیل پہنچ گئی

راولپنڈی:9 مئی کے مقدمات میں پنجاب پولیس کی خصوصی تفتیشی ٹیم اڈیالہ جیل راولپنڈی پہنچ گئی ہے، جہاں بانی پی ٹی آئی سے تفتیش کی جائے گی۔
 پولیس کی تفتیشی ٹیم ڈی ایس پی آصف جاوید کی سربراہی میں اڈیالہ جیل پہنچی، جس میں انسپکٹر محمد اسلم، انسپکٹر محمد عالم، انسپکٹر محمد ارحم اور پنجاب فارنزک یونٹ کے ماہر عابد ایوب بھی شامل ہیں۔
ذرائع کے مطابق تفتیشی ٹیم بانی پی ٹی آئی کا پولی گرافک ٹیسٹ بھی کرے گی تاکہ 9 مئی کے پرتشدد واقعات سے متعلق حقائق سامنے آ سکیں۔
دوسری جانب جیل ذرائع کا کہنا ہےکہ تفتیشی ٹیم بانی پی ٹی آئی سے سوالات کے ساتھ ساتھ پولی گرافک ٹیسٹ کی تیاری مکمل کر چکی ہے۔ یہ ٹیسٹ 9 مئی کے حملوں، املاک کو نقصان پہنچانے اور عسکری تنصیبات پر حملوں سے متعلق حقائق جاننے کے لیے کلیدی کردار ادا کرے گا۔
واضح رہے کہ کچھ روز قبل پولیس نے 9 مئی کے مقدمات میں بانی پی ٹی آئی کا پولی گرافک اور فوٹوگرافک ٹیسٹ کرانے کا فیصلہ کیا تھا جس کے لیے پراسیکیوشن نے انسداد دہشتگردی عدالت میں باقاعدہ درخواست جمع کرائی تھی۔
لاہورکی انسدادِ دہشت گردی عدالت نے تمام فریقین کے مؤقف سننے کے بعدبانی پی ٹی آئی کا پولی گرافک ٹیسٹ کروانے کی اجازت دی تھی۔