لاہور: کار سواروں نے خاتون کو اغوا کرلیا، واقعے کی سی سی ٹی وی فوٹیج سامنے آگئی

لاہور:صوبائی دارالحکومت لاہور کے علاقے ڈیفنس اے میں خاتون کو کار سواروں نے اغوا کرلیا، واقعے کی سی سی ٹی وی فوٹیج بھی سامنے آگئی۔
تفصیلات کے مطابق لاہور کے علاقے ڈیفنس اے میں ایک خاتون کو کار سواروں نے جبری طور پر کار میں سوار کروایا اور ساتھ لے گئے، سی سی ٹی وی فوٹیج میںدیکھا جا سکتا ہے کہ دو ملزمان کو مہوش نامی خاتون کو زبردستی پکڑ کر کار میں ڈالتے ہوئے دیکھا جاسکتا ہے۔
پولیس نے مغوی خاتون کے بھائی امین کی مدعیت میں مقدمہ درج کرلیا۔
مدعی مقدمہ کے مطابق میری بہن کو سابق بہنوئی فیاض نے ساتھیوں کے ساتھ ملکر اغوا کیا ہے، مدعی مقدمہ کے مطابق بہن کو 6 ماہ قبل طلاق ہوگئی تھی۔
ایف آئی آر میں ایوب اور ایک نامعلوم ملزم کو بھی نامزد کیا گیا ہے۔
دوسری جانب ایس پی کینٹ ڈویژن قاضی علی رضا کے مطابق اغوا کاروں کی گرفتاری کے لیے چھاپوں کا سلسلہ جاری ہے جلد ہی مغویہ کو بازیاب کروا لیا جائے گا۔
انہوں نے مزید کہا کہ ملزما ن کی گرفتاری کے لیے ایس ایچ او ڈیفنس اے خرم شہزاد  کے ہمراہ ایک ٹیم تشکیل دے دی گئی ہے جو فوٹیج اور دیگر شواہد کی روشنی میں مغویہ کی بازیابی کے لئے کوشش کر رہی ہے۔جلد ملزمان  قانون کی گرفت میں ہونگے۔