تیسرا ٹی 20: بنگلہ دیش کا پاکستان کو جیت کے لیے 197 رنز کا ہدف

لاہور:تیسرے ٹی20  میچ میں بنگلہ دیش نے پہلے بلے بازی کرتے ہوئے پاکستان کو جیت کے لیے 197 رنز کا ہدف دیا ہے۔
بنگلہ دیش کی جانب سے تنزید حسن اور پرویز حسین ایمان نے ٹیم کو 110 رنز کا عمدہ آغاز فراہم کیا، اس دوران پرویز نے اپنی نصف سینچری مکمل کی، وہ 34 گیندوں پر 4 چھکوں اور 7 چوکوں کی مدد سے 66 رنز بناکر آؤٹ ہوئے۔

بنگلہ دیش کی جانب سے پرویز حسین 66 رنز کیساتھ نمایاں رہے،تنزید حسن 42،توحید 25 اور لٹن داس نے 22 رنز بنائے۔

قومی ٹیم کی جانب سے حسن علی، عباس آفریدی نے 2،2 جب کہ فہیم اشرف اور شاداب خان نے ایک ایک کھلاڑی کوآؤٹ کیا۔

اس سے قبل لاہور کے قذافی اسٹیڈیم میں پاکستان اور بنگلہ دیش کے درمیان ٹی20 سیریز کے تیسرے اور آخری ٹی20 کا ٹاس قومی ٹیم کے کپتان سلمان علی آغا نے جیت کر مہمان ٹیم کو بیٹنگ کی دعوت دی۔
 ٹاس کے موقع پر گفتگو کرتے ہوئے قومی کرکٹ ٹیم کے کپتان سلمان آغا نے کہا کہ وکٹ آج بھی اچھی لگ رہی ہے اور کوشش کریں گے کہ بنگلہ دیش کو کم سکور تک محدود رکھا جائے۔
 دوسری جانب بنگلہ دیشی ٹیم کے کپتان نے ٹاس کے بعد گفتگو کرتے ہوئے کہا کہ انہیں خوشی ہے کہ پہلے بیٹنگ کا موقع ملا ہے۔

آج کے میچ میں پاکستان کی ٹیم میں ایک تبدیلی کی گئی ہے ،فاسٹ باؤلر حارث روف کی جگہ عباس آفریدی کو شامل کیا گیا ہے،جبکہ بنگلہ دیشی ٹیم میں بھی ایک تبدیلی کی گئی ہے، انجری کا شکار شریف الاسلام کی جگہ خالد احمد کو ٹیم میں شامل کیا گیا ہے۔ 
خیال رہے کہ دونوں ٹیموں کے درمیان جاری سیریزمیں پاکستان 0۔2 سے برتری حاصل ہے ۔